وقۋ-اعارتۋ مينيسترلىگى رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعى جەلىدە تاراعان 6-سىنىپقا ارنالعان «جاراتىلىستانۋ» وقۋلىعىنداعى ۆەبسايتقا رەسمي تۇسىنىك بەردى، دەپ حابارلايدى "ادىرنا" ۇلتتىق پورتالى.
الەۋمەتتىك جەلى قولدانۋشىسىنىڭ ايتۋىنشا، وقۋلىقتا بەرىلگەن ۆەب-سايت سىلتەمەسى ءبىلىم رەسۋرسىنا ەمەس، ۇلكەندەرگە ارنالعان (+18) سايتقا الىپ بارادى.
«اتالعان وقۋلىق مەملەكەتتىك ساراپتامادان ءوتىپ، 2017 جىلى ورىس تىلىندە وقىتاتىن مەكتەپتەردە قولدانۋعا رۇقسات بەرىلگەن. وسى ۋاقىتقا دەيىن وقۋلىق مازمۇنىنا قاتىستى شاعىم تۇسكەن جوق. §33 «جاسۋشا الەمىنە ەكسكۋرسيا» تاپسىرماسىندا وقۋشىعا جاسۋشا ورگانويدتارىنىڭ فۋنكتسيالارىن ورناتۋ ءۇشىن انىقتامالىق دەرەكتەر مەن ينتەرنەت-رەسۋرستاردى پايدالانۋ ۇسىنىلادى. سايت ىقتيمال رەسۋرستاردىڭ ءبىرى رەتىندە كورسەتىلگەن biofile.ru سايتى وقۋلىق ساراپتامادان وتكەن كەزدە «بيوفايل» عىلىمي-اقپاراتتىق جۋرنالىنىڭ ۆەب-سايتى بولاتىن (سايتتىڭ سكرينى بار)»، - دەلىنگەن حابارلامادا.
ورتالىقتىڭ اقپاراتىنشا، وقۋلىقتاعى ۆەب-رەسۋرستار بالالاردىڭ اقپاراتتى ىزدەۋ جانە تالداۋ داعدىلارىن دامىتۋ ماقساتىندا ۇسىنىلعان.
«تەكسەرۋ بارىسىندا سايتتىڭ قازىرگى ۋاقىتتا جۇمىس ىستەمەيتىنى انىقتالدى. بىراق، براۋزەردەن سايت اتاۋىن تەرگەندە، ىزدەۋ تىكەلەي كۇماندى تانىسۋ سايتتارىنا قاراي باعىتتايدى. مۇراعات قىزمەتى بويىنشا تالداۋ ناتيجەسى «web.archive.org» سايتتىڭ 2011 جىلدان بەرى بار ەكەنىن كورسەتتى، سوڭعى جىلدارى بەلسەندىلىك كۇرت تومەندەگەن. 2023 جىلدىڭ 17 اقپانى مەن 9 ناۋرىزىندا سايت اكىمشىسى ۇسىنىلماعان سايتتارعا باعىتتايتىن جاڭا URL رەسۋرستى قوسىپ قويعان (ەكران سكرينى بار)»، - دەيدى ۆەدومستۆودان.
سونداي-اق، ءبىلىم الۋشىلاردىڭ اقپاراتتىق قاۋىپسىزدىگىن قامتاماسىز ەتۋ ماقساتىندا ورتالىق قۇقىق قورعاۋ جانە باسقا دا مەملەكەتتىك ورگاندارعا ءتيىستى سۇراۋ سالاتىنىن حابارلادى.
سونىمەن قاتار، باسپالارمەن بىرلەسىپ بارلىق وقۋلىقتارداعى ۆەب-سايتتارعا تەكسەرۋ جۇرگىزىلىپ، پەداگوگتار مەن اتا-انالارعا ءتيىستى نۇسقاۋلىق حات جاسالادى.
وقۋ-اعارتۋ مينيسترلىگى ءىستىڭ ءمان-جايى تەكسەرىلىپ، كىنالىلەردىڭ جاۋاپقا تارتىلاتىنىن ءمالىم ەتتى.
