ادۆوكات بۇرىنعى مادەنيەت جانە سپورت ءمينيسترى ارىستانبەك مۇحامەديۇلىن قاماۋدا ۇستاۋ ءتارتىبىن ۇيقاماققا اۋىستىرۋدى سۇرادى، دەپ حابارلايدى "ادىرنا" ۇلتتىق پورتالى.
اقپان ايىندا مۇحامەديۇلىن قاماۋدا ۇستاۋ مەرزىمى 2 ايعا ۇزارتىلعان ەدى.
ايتا كەتەيىك، سوت پروتسەسى بايقوڭىر اۋداندىق №2 سوتىندا قارالىپ جاتىر. مۇحامەديۇلى سوت وتىرىسىنا ونلاين رەجيمدە قاتىسىپ وتىر. سەبەبى ەلوردادا قاردىڭ قالىڭ تۇسۋىنە بايلانىستى كۇدىكتى سوت ءوتىپ جاتقان عيماراتقا جەتكىزىلمەدى.
«ادۆوكاتىڭىز قىلمىس قۇرامىنىڭ بولماۋىنا بايلانىستى سىزگە قاتىستى قىلمىستىق ءىستى توقتاتۋ جونىندەگى ماسەلەنى شەشۋ تۋرالى وتىنىشپەن جۇگىندى. سونداي-اق سىزگە قاتىستى بۇلتارتپاۋ شاراسىن ۇيقاماققا وزگەرتۋدى سۇرادى»، - دەدى سۋديا باعلان ىدىرىسوۆ سوت وتىرىسىندا ا. مۇحامەديۇلىنا قاراتا ايتقان سوزىندە.
ءوز كەزەگىندە قر ۇلتتىق مۋزەيىنىڭ ەكس-ديرەكتورى وسىعان دەيىن اتالعان ماسەلەگە قاتىستى ءتيىستى ءوتىنىش جاسالعانىن ايتتى.
«ۇيقاماققا اۋىستىرۋ تۋرالى ءوتىنىش جولداعان ەدىك. جاقىندا ماعان ەكىنشى وپەراتسيا جاسالدى. دەنساۋلىق جاعدايىم ناشارلاپ كەلەدى. وسى ورايدا ۇيقاماققا اۋىستىرۋ شەشىمى دۇرىس بولار ەدى»، - دەدى ا. مۇحامەديۇلى.
سونىمەن قاتار ول بۇل ءىستى قاراۋدى توقتاتۋ كەرەك ەكەنىن ايتتى.
«وتىرىس بارىسىندا ادۆوكاتتار ايتقانداي، ءىس بويىنشا ەشتەڭە دالەلدەنبەدى، بىردە-ءبىر فاكتى جوق. سوعان قاراماستان، ءبىز وسىندا قاماۋدامىز»، - دەدى ا. مۇحامەديۇلى.
