13 ساۋىردەن باستاپ رەجيسسەر دانيار امانگەلديەۆتىڭ دەبيۋتتىك كوركەم ءفيلمى - «سەنبە» وتباسىلىق كومەدياسى پروكاتقا شىقتى، دەپ حابارلايدى “ادىرنا” ۇلتتىق پورتالى.
فيلمدە ۇساق-تۇيەك ايلا-شارعىمەن باي ايەلدەردىڭ ەسەبىنەن پايدا تاپقان الاياق تۋرالى ايتىلادى. دەگەنمەن، فيلم سوڭىندا ول ۇلكەن بايلىققا كەنەلەدى.
ايتا كەتەيىك، يدەيا اۆتورى جانە رەجيسسەرى – تانىمال كليپتەردىڭ رەجيسسەرى دانيار امانگەلديەۆ. ول مولدانازار، V$XV Prince, Say Mo, Raim, Sadraddin جانە تاعى باسقا ونەرپازدارعا كليپ تۇسىرگەن. 2022 جىلى GAKKU تەلەارناسىندا «تۇيمەداق» تەلەحيكاياسى نا دا رەجيسسەر رەتىندە دە ونەر كورسەتتى.
«العاشىندا زاماناۋي الدارا-كوسە جاساۋ يدەياسى بولدى. جازۋشىلارمەن ءسينوپسيستى تالقىلاي باستاعاندا، ءبىز تاعى بىرنەشە رەجيسسەردىڭ وسىعان ۇقساس وقيعانى تۇسىرەتىنىن بىلدىك. ەكەۋىمەن دە سويلەستىم، بۇل جوبالار اياق استىنان ءجۇرىپ جاتىر ەكەن. ەشكىم ەشكىمگە ارالاسپايدى. بىراق ستسەناريمەن جۇمىس ىستەۋ بارىسىندا ءبىز ءبىرىنشى تۇجىرىمدامادان الشاقتاپ، الاياقتاردىڭ تۇتاس ءبىر وتباسىسى پايدا بولدى”،- دەيدى رەجيسسەر.
جالعان وتباسىنىڭ اكەسى اتانىپ، باستى ءرولدى سومداعان – جاندوس ايباسوۆ.
«كوپتەن بەرى باستى رولدەردە وينامادىم. مەن اكتەر رەتىندە وسى اتموسفەراعا قايتا كىرۋگە مۇددەلى بولدىم. ءيا، مەن جىگىتتەردى قولداعىم كەلدى. مەن ارقاشان دەبيۋتانتتارعا قولداۋ كورسەتۋگە تىرىسامىن. ءرولدى ويناي الماسام دا، تىم بولماسا نۇسقاپ، كەڭەس بەرەمىن. بىزگە جاڭا ماماندار قاجەت، ءبىزدىڭ يندۋستريا سونى تالاپ ەتەدى، ويتكەنى قازاقستاندا كينو وتە جاقسى دامىپ كەلەدى»، -دەدى جاندوس ايباسوۆ.
كۇن سايىن مىڭداعان قازاقستاندىقتار ءتۇرلى الاياقتاردىڭ قۇربانىنا اينالۋدا. بۇل ۇلكەن الاياقتىق تۋرالى قىزىقتى فيلم عانا ەمەس، سونىمەن قاتار مورالدىق وقيعا.
باستى رولدەردە قارلىعاش مۇحامەدجانوۆا، باقىتجان الپەيىسوۆ، الما ساعىندىق جانە باقىتجان اقپاروۆتىڭ (باحا پۋپەر) وينادى. ال كىشىگىرىم، بىراق ماڭىزدى رولدەردى ەرجان جامانقۇلوۆ، ءمادينا اقىلبەكوۆا، اقجول سەرىكجانۇلى (الفا) جانە البەرت تيتتە سومدادى.
ايتا كەتۋ كەرەك، ءفيلمدى شىعارۋدا رەجيسسەر مۋزىكاعا دا باسا نازار اۋدارعان. ويتكەنى، ساۋندترەكتەردىڭ نەگىزگى بولىگىن بەلگىلى رەپەر DASHXX ارنايى جازعان.
«ءبىز DASHXX-تەن مۇنداي قولداۋ كۇتكەن جوقپىز. باستاپقىدا ءبىز ودان فيلمىمىزگە ءبىر ترەك جازۋىن وتىنگەن ەدىك. ءبىز وعان ءفيلمدى مونتاجداپ جىبەردىك، ترەيلەرىن كورسەتتىك، ءبىراز ۋاقىتتان كەيىن ول بىزگە حابارلاسىپ، بىرنەشە ءان جازىپ، EP-البوم جاساعىسى كەلەتىنىن ايتتى. ءبىز ءۇشىن بۇل توسىن-سىي بولدى»، -دەيدى رەجيسسەر.
