بۇگىن 20 مىڭعا جۋىق پارتيا مۇشەسى، «جاستار رۋحى» جاستار قاناتىنىڭ بەلسەندىلەرى مەن «AMANAT» جاقتاستارى ۇگىت ماتەريالدارىن جيناۋعا ارنالعان اۋقىمدى اكتسياعا كىرىستى.
«AMANAT»-تىڭ اتقارۋشى حاتشىسى ەلنۇر بەيسەنباەۆتىڭ ايتۋىنشا، ءبىر ايعا سوزىلعان سايلاۋ ناۋقانىندا بارلىق ساياسي پارتيا مەن ءبىرمانداتتى وكرۋگتەر بويىنشا كانديداتتار ۇگىت-ناسيحات جۇمىسىن بەلسەندى جۇرگىزىپ، بۇكىل ەلىمىزدە بىرنەشە ميلليون پلاكات جاپسىرعان.
«ەندى سول جاپسىرىلعان ۇگىت-ناسيحات ماتەريالدارىنىڭ بارلىعىن جيناپ، تازالاۋىمىز كەرەك. ولاردى قايتا وڭدەۋگە جىبەرۋگە بولادى. بۇل كوممۋنالدىق قىزمەتتىڭ جۇمىسىن ءسال دە بولسا جەڭىلدەتۋگە سەپتەسەدى. مۇنداي ءىس-شارالار قوعامعا قورشاعان ورتانى ۇقىپتى ۇستاۋدىڭ قانشالىقتى ماڭىزدى ەكەنىن كورسەتىپ، ەكولوگيالىق مادەنيەتتىڭ تۇراقتى مودەلىن قالىپتاستىرۋعا كومەكتەسەدى. وسى باستامانى پارتيا توراعاسى ەرلان قوشانوۆ جاقىندا وتكەن «حالىقپەن بىرگە!» فورۋمىندا ايتقان بولاتىن»،-دەدى ەلنۇر بەيسەنباەۆ.
ايتا كەتەيىك، پلاكاتتاردى جيناۋ جۇمىسى ەلىمىزدىڭ بارلىق وڭىرىندە ءجۇرىپ جاتىر. بۇل ىستەن اتىراۋ قالاسىنداعى پارتيالىقتارى دا شەت قالمادى. بەلسەندىلەر بازارلارداعى، ساۋدا ورتالىقتارىنداعى جانە تۇرعىن ۇيلەردىڭ اۋلالارىنداعى ۇگىت-ناسيحات پلاكاتتارىن جيناپ جاتىر.
«قاعاز قالدىقتارى بۇكىلالەمدىك قوقىس كولەمىندە 4-ءشى ورىندا تۇر. ءبىز پلاكاتتاردى جيناۋ جۇمىسىن تەك وبلىس ورتالىعىندا عانا ەمەس، جالپى وبلىس بويىنشا، اۋدانداردا دا جۇرگىزەمىز. ولاردى ماكۋلاتۋرا قابىلداۋ پۋنكتتەرىنە تاپسىرامىز»، - دەدى «جاستار رۋحى» اتىراۋ وبلىستىق فيليالىنىڭ توراعاسى ابىلاي قۇرمەتۇلى.
اكتسياعا شىمكەنتتىكتەر دە قوسىلدى. وندا قالالىق ساياباقتار مەن الاڭدارداعى ستەندتەردەن پلاكاتتار الىنىپ تاستالادى.
«ۇگىت-ناسيحات بارىسىندا پارتيا مەن جاستار قاناتىنىڭ 580-گە جۋىق مۇشەسى 350 مىڭنان استام ماتەريال تاراتتى. ەندى ءبارىمىز سولاردى جيناۋعا كىرىستىك. وسىلايشا، قالامىزدا تازالىقتىڭ ساقتالۋىنا ءوز ۇلەسىمىزدى قوسامىز»,-دەيدى «جاستار رۋحى» جق-نىڭ بەلسەندىسى تۇرسىنبەك باقىتجان.
