ازاماتتاردىڭ سايلاۋعا كەلگەنىنىڭ ءوزى ەلىمىزدىڭ دامۋىنا نەمقۇرايلى تانىتپاعانىنىڭ بەلگىسى. مۇنداي پىكىردى پرەزيدەنتى اكىمشىلىگى باسشىسىنىڭ ورىنباسارى ايدا بالاەۆا ايتتى، دەپ حابارلايدى "ادىرنا" ۇلتتىق پورتالى baq.kz-كە سىلتەمە جاساپ.
ايدا بالاەۆا ءماجىلىس جانە ءماسليحات دەپۋتاتتىعىنا كانديداتتاردىڭ كەزەكتەن تىس سايلاۋىندا داۋىس بەرىپ، جۋرناليستەردىڭ سۇراعىنا جاۋاپ بەردى.
ءار ازامات وزگەرىستى وزىنەن باستاۋى كەرەك. ازاماتتاردىڭ سايلاۋعا كەلگەنىنىڭ ءوزى ەلىمىزدىڭ دامۋىنا نەمقۇرايلى تانىتپاعانىنىڭ بەلگىسى. ماجىلىسكە بولسىن، ماسليحاتقا بولسىن ۇلتجاندى، بەلسەندى، ەلىمىزدىڭ نە بولماسا بەلگىلى ءبىر سالانىڭ دامۋىنا ۇلەس قوساتىن ازاماتتار كەلىپ جاتسا، وندا ول مەملەكەتتىك جۇيەنىڭ وڭ وزگەرىسىنە ىقپال ەتەتىنى ءسوزسىز. سوندىقتان قازىر ءماسليحاتتا دا، ماجىلىستە دە بەلسەندى ازاماتتاردىڭ بارىن كورىپ وتىرمىز. ءتىپتى استانا مەن الماتىنىڭ وزىندە 3 ورىنعا 100-گە جۋىق ادامنان قاتىسىپ، بەلسەندىلىك تانىتىپ وتىر، - دەدى بالاەۆا.
سوزىنشە، بۇل ازاماتتار الداعى ۋاقىتتا ەلىمىزدىڭ دامۋىنا ءوز ۇلەستەرىن قوسادى.
سايلاۋعا ءارتۇرلى سالانىڭ ازاماتتارى قاتىسىپ جاتىر. ارالارىندا بلوگەرلەر دە، كاسىپكەرلەر دە جانە تاعى باسقا سالا ماماندارى دا بار. ءار ادامنىڭ سايلاۋعا جاۋاپكەرشىلىكپەن قاراعانى ماڭىزدى. قازىر وزدەرىڭىز سايلاۋعا قاتىسۋشىلاردىڭ قانشالىقتى بەلسەندى ەكەنىن كورىپ وتىرسىزدار. استانانىڭ وزىندە 4 بيۋللەتەن سالىپ وتىرمىز. بۇل ۇمىتكەرلەردىڭ ىشىنەن ەڭ ىقپالدىلارى، بەلسەندىلەرى ءوتىپ جاتسا، وڭ وزگەرىستەر بولادى دەپ ويلايمىن. بۇرىن ساياسي پارتيالار تۋرالى اۋىلدى جەرلەردە بىلە بەرمەيتىنىنە قاتىستى سىن ايتىلاتىن. ەندى بۇل پارتيالار جەرگىلىكتى جەرلەردەگى وكىلدەرىن سايلاۋعا تارتىپ، وتۋىنە ىقپال جاساپ جاتىر. تەك مەملەكەتتىك قىزمەتتە عانا ەمەس، قوعامدا، قوعام ينستيتۋتتارىندا وزگەرىستەر بولۋى كەرەك. قارار وتىرساق، رەفورمالاردىڭ بارلىعى ساياسي پارتيالاردىڭ بەلسەندىلىگىن ارتتىرىپ وتىر. مىسالى، 2019 جىلدارى وتكەن سايلاۋدى باقىلاۋعا بىرەن-ساراڭ عانا ۇيىم قاتىسسا، ال قازىر باقىلاۋشى ۇيىمداردىڭ سانى وتە ۇلكەن، - دەپ ايتتى ايدا بالاەۆا.
سونىمەن قاتار ءماجىلىس پەن ماسليحاتتاعى دەپۋتاتتاردىڭ دۇرىس سايلانۋىن قولدايتىن ازاماتتار دا سايلاۋدىڭ اشىق، تازا بولۋىنا وزدەرىنىڭ ىقپالىن تيگىزىپ ءجۇر.
"ادىرنا" ۇلتتىق پورتالى
