دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور الماز جۇماكەەۆ پاراشيۋتپەن سەكىرۋ كەزىندە ساربازدىڭ قازا بولۋىنا بايلانىستى قايعىرا كوڭىل ايتتى، دەپ حابارلايدى “ادىرنا” ۇلتتىق پورتالى.
ايتا كەتەيىك، 2023 جىلعى 18 قاڭتاردا استانا قالاسى ماڭىندا پاراشيۋتپەن جوسپارلى سەكىرۋ كەزىندە مەرزىمدى قىزمەتتەگى سارباز قازا تاپتى.
قايعىلى وقيعا بولعان اسكەري ءبولىم ارنايى ماقساتتاعى ءبولىم بولىپ تابىلادى جانە قۇرلىق اسكەرلەرى باس قولباسشىسىنىڭ باسقارماسىنا تىكەلەي باعىنادى.
“كۇن سايىن اسكەري قىزمەتشىلەر، سونىڭ ىشىندە وندا قىزمەت ەتەتىن ساربازدار ومىرگە قاۋىپتى وقۋ-جاۋىنگەرلىك مىندەتتەردى ورىندايدى. تىكۇشاق بورتىنان 800 مەتر بيىكتىكتەن سەكىرۋ ساربازعا دا، وفيتسەرگە دە، كەلىسىمشارت بويىنشا اسكەري قىزمەتشىگە دە قاۋىپتى. بۇل قىزمەتتە جۇرگەننىڭ ءاربىرى قانشالىقتى تاۋەكەلگە باراتىنىن تۇسىنەمىز، دەسە دە كەز كەلگەن تاپسىرمانى ورىنداۋعا دايىنبىز. سوندىقتان ارنايى ماقساتتاعى بولىمشەلەر، سونداي-اق دەسانتتىق-شابۋىلداۋ اسكەرلەرى ارميانىڭ بەتكەۇستارى بولىپ سانالادى.
قۇرامالار مەن اسكەري بولىمدەردىڭ كومانديرلەرى جەكە قۇرامنىڭ جاراقاتتانۋى مەن قازا بولۋ جاعدايلارىن بولدىرماۋ ءۇشىن قولدان كەلگەن بارلىق شارالاردى قابىلدايدى.
قايعىلى وقيعا دەسانتشىلاردى دا بەي-جاي قالدىرمادى. ارنايى ماقساتتاعى ءبولىمنىڭ اسكەري قىزمەتشىلەرى دە، دەسانتشىلار سەكىلدى پاراشيۋتپەن سەكىرۋ وقۋ-جاۋىنگەرلىك مىندەتتەرىن ورىندايدى.
دەسانتتىق-شابۋىلداۋ اسكەرلەرىنىڭ قولباسشىلىعى قازا تاپقان اسكەري قىزمەتشىنىڭ تۋىستارى مەن جاقىندارىنا، سارباز قىزمەت ەتكەن قۇرلىق اسكەرلەرى مەن اسكەري ءبولىمنىڭ قولباسشىلىعىنا قايعىرا كوڭىل ايتادى. بەيبىت ۋاقىتتاعى قازا – ەلىمىزدىڭ قارۋلى كۇشتەرىنىڭ بارلىق جەكە قۇرامى ءۇشىن ورنى تولماس قايعى”،- دەپ كوڭىل ايتتى.
