جامبىل وبلىسىندا توننالاعان التىن كەنى بار جەراستى تسەحى انىقتالدى. التىن شىققان جەردى بەلدەن قازعان تۇرعىندار ونى ىڭ-شىڭسىز توناپ كەلگەن. پوليتسيا قىزمەتكەرلەرىنىڭ حابارلاۋىنشا، قازىر 37 جاستاعى جەرگىلىكتى تۇرعىن ۇستالدى.
جەراستى تسەحى شيكىزاتتى، قۇرامىندا باعالى مەتالدارى بار تاستاردى وڭدەۋمەن اينالىسادى. سونىمەن قاتار جەكە تۇرعىن ءۇي ىرگەسىنەن ەلەكترلى ۇساتقىش ديىرمەن، ۇساقتالعان رۋدا قالدىقتارى، ەلەۋىش، ماگنيت، تاۋ جىنىستارىن تاسىمالدايتىن اربالار، كۇرەكتەر، سىناپ قوسىلعان سۇيىقتىق، ەكى ۇلكەن قازاندىق جانە 10 تونناعا جۋىق التىن كەنى تابىلدى.
قويمادا ەكى ەر ادام يەسىنە قالتقىسىز جۇمىس ىستەگەن.
قازىر قر قىلمىستىق كودەكسىنىڭ 295-بابى، 1-بولىگىندەگى "باعالى مەتالدار مەن اسىل تاستاردىڭ، قۇرامىندا باعالى مەتالدار بار شيكىزاتتىڭ زاڭسىز اينالىمى" بويىنشا سوتقا دەيىنگى تەرگەۋ باستالدى.
- مەملەكەتكە كەلتىرىلگەن شىعىن ءالى انىقتالىپ جاتىر. بىرقاتار قاجەت ساراپتامالار تاعايىندالدى، - دەپ قورىتىندىلادى پوليتسيا.
14 قاراشادا اباي وبلىسى جارما اۋدانىنداعى ەدىلباي ۋچاسكەسىندە دە قۇرامىندا التىنى بار كەننىڭ زاڭسىز وندىرىلگەنى حابارلانعان ەدى. جارماداعى قىلمىستىق توپ مۇشەلەرىنىڭ اراسىندا شەتەلدىكتەر دە بولعان.
"ادىرنا" ۇلتتىق پورتالى
