بقو-دو ورنالاسقان «كۋبلەي» كونسەرۆى زاۋىتى قازاقستانداعى ەڭ ءىرى ءوندىرىس ورىندارى ساپىندا. زاۋىتتا ءۇش اۋىسىمدا 700-دەن استام ادام ەڭبەك ەتەدى. «كۋبلەي» تاۋلىگىنە 600 مىڭ بانكا ءونىم شىعارادى ەكەن. بۇل قازاقستان نارىعىنداعى كونسەرۆىلەردىڭ 65 پايىزىمەن تەڭ. ياعني، اتالعان ءوندىرىس تۇرالاسا حالىقتىڭ باسىم بولىگىنە قيىن بولعالى تۇر. ويتكەنى، زاۋىتتان كۇندەلىكتى شىعاتىن 600 مىڭ بانكانىڭ ورنى ويسىراپ قالادى. وسى ماسەلەنى كوتەرگەن «كۋبلەي» جشس وكىلدەرى دابىل قاعىپ، الماتىداعى قازاقستان ءباسپاسوز كلۋبىندا باق وكىلدەرىنە جيىن وتكىزدى.
داۋدىڭ باسى ورال قالاسىندا ورنالاسقان «كۋبلەي» جشس قاراستى زاۋىت جانىنان ءبىر جەرگىلىكتى كاسىپكەر جەر ساتىپ العانىنان باستالعان. العاشىندا وندىرىستىك باعىتقا ارنالعان جەر ءاپ ساتتە تۇرعىن ءۇي قۇرىلىسىنا اينالىپ شىعا كەلگەن. جەر ساتىپ العان كاسىپكەر زاۋىت شەكاراسىنان ءنابارى 50 مەتر جەردەن كوپقاباتتى تۇرعىن ءۇي قۇرىلىسىن باستاپ جىبەرگەن. ەرتەڭ مۇنىڭ سوڭى ۇلكەن داۋعا، ءتىپتى، زاۋىتتىڭ توقتاپ قالۋىنا اپاراتىنىن باعامداعان «كۋبلەي» باسشىلىعى «ماسەلەنىڭ الدىن الساق» دەپ وتىر.
«قۇقىق قورعاۋ ورىندارى جۇمىس ىستەمەي وتىر. بىزدە رەكرەاتسيالىق، وندىرىستىك ايماقتىڭ دەنى تۇرعىن ۇيگە بەرىلىپ كەتكەن. ورال قالاسىنداعى ەكولوگتار، اكتيۆيستەر شىرىلداپ جاتسا دا ونى ەشكىمنىڭ ەستىگىسى كەلمەيدى. بۇل ماسەلەگە ەڭ ءبىرىنشى قر پرەزيدەنتى، ۇكىمەت باسشىسى قۇلاق اسپاسا قيىن بولعالى تۇر»، – دەدى جەر قۇقىقتارى بويىنشا بىلىكتى زاڭگەر باقىتجان بازاربەك.
زاۋىت وكىلدەرى ءوندىرىس تۇرالاسا، جابىلسا قانشاما ادام جۇمىسسىز قالاتىنىن ايتىپ وتىر.
«بۇكىل قازاقستان «كۋبلەيدىڭ» كونسەرۆىسىن جەيدى. ارينە جاعدايى بار، باي ادامدار كونسەرۆى تۇتىنبايدى. «كۋبلەيدىڭ» نەگىزگى تۇتىنۋشىسى جاعدايى تومەن جانە ورتاشا وتباسىلار. زاۋىت اۋىلشارۋاشىلىعى سالاسىنىڭ دامۋىنا دا ۇلەس قوسىپ وتىر. 3000 مىڭ فەرمەرمەن جۇمىس ىستەيدى، سولاردان ەت الادى. ءار فەرمادا 5 ادامنان جۇمىس ىستەيدى دەسەك، زاۋىت تۇرالاسا 15 مىڭ، زاۋىتتا ىستەيتىن 700, جالپى، 15 700 ادام جۇمىسسىز قالادى. مۇنى ويلاپ وتىرعان كىم بار؟ 15 700 ادامنىڭ ارتىندا ءبىر-ءبىر وتباسى تۇر ولاردى كىم اسىرايدى؟ كىم جۇمىس تاۋىپ بەرەدى. «كۋبلەي» نارىقتان كەتسە ول شىعارعان ءونىمنىڭ ورنىن كىم تولتىرادى. ەرتەڭ باعا شارىقتاپ كەتپەيتىنىنە كىم كەپىل؟!»، – دەدى تۇتىنۋشىلار كواليتسياسىنىڭ وكىلى مۇرات ابەنوۆ.
سپيكەرلەر قالانىڭ باس جوسپارى بويىنشا جۇمىس جۇرگىزىلسە، ماسەلە وڭتايلى شەشىلەتىنىن ايتادى. قانداي بولعان جاعدايدا دا زاۋىت جانىنان تۇرعىن ءۇي سالۋ، ول جۇردە تۇرۋ اقىلعا قونىمسىز ىسپەتتى. ءبىر جاعى ءوزى از ءوندىرىس ورىندارىنىڭ جابىلۋىنا بيلىك تە، حالىق تا جول بەرە قويماس.
