قازتەمىرترانس قوستاناي فيليالىنىڭ ديرەكتورى سىبايلاس جەمقورلىق ءۇشىن سوتتالدى، دەپ حابارلايدى «ادىرنا» ءتىلشىسى انتيكورعا سىلتەمە جاساپ.
«2022 جىلعى 3 قازاندا قوستاناي قالاسىنىڭ №2 سوتىمەن «قازتەمىرترانس» اق قوستاناي فيليالىنىڭ ديرەكتورى ب. ۋسابەكوۆ پەن «ۆاديسا م» جشس ديرەكتورى س. تايروۆقا قاتىستى ايىپتاۋ ۇكىمى شىعارىلدى.
جوعارىدا اتالعان تۇلعالار جۇك ۆاگوندارىن كەدەرگىسىز جانە جەدەل جەتكىزگەنى ءۇشىن پارا الدى، بەردى دەپ ايىپتالدى.
سوت ۇكىمىمەن ۋسابەكوۆكە ورتاشا قاۋىپسىزدىك مەكەمەسىندە 6 جىلعا باس بوستاندىعىنان ايىرۋ جازاسى تاعايىندالدى»،—دەلىنگەن حابارلامادا.
سول ۇكىممەن تايروۆقا پارا بەرۋ فاكتىسى بويىنشا پارانىڭ جيىرما ەسەلەنگەن سوماسى مولشەرىندە ايىپپۇل تاعايىندالدى، بۇل 24 ملن تەڭگەنى قۇرايدى.
سوتتالعاندار ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرىلادى.
ۇكىم زاڭدى كۇشىنە ەنگەن جوق.
