بۇگىن الماتىدا «وزگەرىس ۇستىندەگى الەمدە تەڭ دارەجەدە ءبىلىم بەرۋدى ىلگەرىلەتۋ» تاقىرىبىندا 10-شى ICBCB 2022 حالىقارالىق كونفەرەنتسياسى باستالدى. ەكى كۇندىك عىلىمي شاراعا ۇلىبريتانيا، ءۇندىستان، تايلاند، قىرعىزستان، رەسەيدەن كەلگەن شەتەلدىك جانە وتاندىق عالىمدار قاتىسىپ جاتىر.
سۋلەيمان دەميرەل اتىنداعى ۋنيۆەرسيتەت رەكتورى ءالىمجان بەكەجانۇلى شارانىڭ اشىلۋ سالتاناتىندا قاتىسۋشىلارعا ساتتىلىك تىلەپ، پەداگوگتەردى ۇستازدار كۇنىمەن قۇتتىقتادى.
«بۇگىن عالىمدار الەمدە تەڭ دارەجەدە ءبىلىم بەرۋدى تالقىلايدى. حالىقارالىق دەڭگەيدەگى مۇنداي عىلىمي كونفەرەنتسيانى وتكىزۋ ۋنيۆەرسيتەتىمىز ءۇشىن ۇلكەن مارتەبە. شارانى ۇيىمداستىرۋداعى باستى ماقساتىمىز – جاھاندانۋ داۋىرىندە تۇتاس ءبىلىم بەرۋ جۇيەسىنە نەگىزدەلگەن قۇندىلىقتاردى جانە ءتۇرلى مادەنيەتتەر اراسىنداعى ىنتىماقتاستىق قارىم-قاتىناستى دارىپتەۋ. سونداي-اق وتاندىق جانە حالىقارالىق عالىمدارمەن عىلىمي جانە كاسىبي بايلانىس ورناتاتىن الاڭ قۇرۋ، ءبىلىم سالاسىنداعى وزەكتى ماسەلەلەردىڭ وڭتايلى شەشىمىن تابۋ. وسى ەكى كۇننىڭ ىشىندە اتالعان ماسەلەلەر بويىنشا ۇسىنعان زەرتتەۋلەر ءبىلىم بەرۋ پروتسەسىن دامىتۋعا ۇلەس قوسادى دەگەن سەنىمدەمىن. كونفەرەنتسياعا قاتىسىپ جاتقان ۇستازدار قاۋىمىن كاسىبي مەرەكەسىمەن قۇتتىقتايمىن», - دەدى ول.
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى، PhD دوكتور دارحان ءبىلالوۆ عىلىمي شارانىڭ ماڭىزدىلىعىن اتاپ ءوتتى.
«بۇگىنگى حالىقارالىق عىلىمي كونفەرەنتسيا – وتە ماڭىزدى شارا. تاقىرىپتىڭ ءوزى ايتىپ تۇرعانداي، عالىمدار الەمدەگى وزەكتى ماسەلەلەردىڭ ءبىرىن كوتەرىپ جاتىر. بىرىنشىدەن، بالالاردىڭ تەڭ دارەجەدە ساپالى ءبىلىم الۋى كەرەك. بۇل قازاقستاندا عانا ەمەس، الەم بويىنشا كۇن تارتىبىندە تۇرعان وزەكتى پروبلەما. بۇگىنگى كونفەرەنتسياعا قاتىسىپ جاتقان زەرتتەۋشىلەر وسى تاقىرىپتاعى زەرتتەۋلەرى تۋرالى ايتىپ، ماڭىزدىلىعىن ءتۇسىندىرىپ قانا قويماي، ونىڭ ناقتى شەشۋ جولدارىن، مەحانزيمىن دە ۇسىنىپ جاتىر», – دەدى رەكتور.
حالىقارالىق عىلىمي كونفەرەنتسيادا ونلاين جانە وفلاين فورماتتا ءبىلىم بەرۋ جۇيەسىن جاقسارتۋعا ارنالعان كوپتەگەن يدەيا ايتىلىپ، عالىمدار زەرتتەۋ جۇمىستارىمەن ءبولىسىپ جاتىر. ولاردىڭ ىشىندە ءبىلىم بەرۋ سالاسىنداعى تاۋەلسىز زەرتتەۋشى، ءۇندىستاننان كەلگەن پروفەسسور Sugata Mitra, لوندون ۋنيۆەرسيتەتتىك كوللەدجىنىڭ عىلىم جانە ەكولوگيالىق ءبىلىم بەرۋ پروفەسسورى Justin Dillon, پروفەسسور، دوكتور، تايلاندتا پارلامەنتىنىڭ دەپۋتاتى Kanok Wongtrangan, اباي اتىنداعى قازاق ۇلتتىق پەداگوگيكا ۋنيۆەرسيتەتىنىڭ رەكتورى، PhD دوكتورى دارحان ءبىلالوۆ، قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى، PhD دوكتورى گۇلميرا قاناي، كيمەپ ۋنيۆەرسيتەتىنىڭ دەكانى، پروفەسسور جۋلدىز سماگۋلوۆا، نازارباەۆ ۋنيۆەرسيتەتىنىڭ پروفەسسورى دۋيشون شاماتوۆ باستى سپيكەرلەر رەتىندە قاتىسىپ جاتىر.
