مەملەكەت باسشىسى قاسىم-جومارت توقاەۆتىڭ تاپسىرماسىمەن پارلامەنت سەناتىنىڭ توراعاسى ماۋلەن اشىمباەۆ ۇلىبريتانيا جانە سولتۇستىك يرلانديا قۇراما كورولدىگىنىڭ پاتشايىمى ءىى ەليزاۆەتانى مەملەكەتتىك جەرلەۋ راسىمىنە قاتىستى. اتالعان ءراسىم 2022 جىلعى 18-19 قىركۇيەك كۇندەرى لوندون قالاسىندا ءوتتى. بۇل تۋرالى سەناتتىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
سەنات سپيكەرى 18 قىركۇيەكتە ۆەستمينستەر حوللىندا پاتشايىمنىڭ تابىتىن زيارات ەتۋ راسىمىنە قاتىسىپ، قازاقستان رەسپۋبليكاسىنىڭ اتىنان رەسمي كوڭىل ايتۋ كىتابىنا جازبا قالدىردى. ول II ەليزاۆەتا اسا كورنەكتى كوشباسشى جانە بريتان ۇلتىنىڭ بىرلىگى مەن تۇراقتىلىعىنىڭ سيمۆولى بولعانىن، الداعى ۋاقىتتا دا پاتشايىمنىڭ تەكتىلىگى، قادىر-قاسيەتى مەن جەتىستىكتەرى الەمدەگى ميلليونداعان ادامدى جىگەرلەندىرە بەرەتىنىن اتاپ ءوتتى.
سول كۇنى ماۋلەن اشىمباەۆ بۋكينگەم سارايىندا كورول ءىىى ءچارلزدىڭ ەۋروپا، تاياۋ شىعىس جانە ازيا ەلدەرىنىڭ، ۇكىمەتتەر مەن حالىقارالىق ۇيىمداردىڭ باسشىلارىنىڭ جانە كورولدىك وتباسى مۇشەلەرىنىڭ قۇرمەتىنە ارنالعان قارالى قابىلداۋىنا قاتىستى. سەنات توراعاسى كورول ءىىى چارلزبەن سۇحبات بارىسىندا مەملەكەت باسشىسىنىڭ اتىنان كوڭىل ايتىپ، ەل پرەزيدەنتىنىڭ شەشىمى بويىنشا جاقىن ارادا استانانىڭ ورتالىق ساياباعىنداعى گۇلزارلاردىڭ بىرىنە ءىى ەليزاۆەتا پاتشايىمنىڭ ەسىمى بەرىلەتىنىن جەتكىزدى. ۇلىبريتانيا مونارحى مۇراگەر حانزادا رەتىندە 1996 جىلى قازاقستانعا جاساعان ساپارىن ەسكە الدى. سونداي كورول پاتشايىمنىڭ قازاسىنا بايلانىستى ىقىلاس تانىتقانى ءۇشىن ريزاشىلىعىن ءبىلدىرىپ، قازاقستان باسشىلىعى مەن حالقىنا يگى تىلەكتەرى مەن ءىلتيپاتىن جەتكىزدى.
قازاقستاندىق دەلەگاتسيا 19 قىركۇيەكتە ۆەستمينستەر ابباتتىعىندا وتكەن II ەليزاۆەتا پاتشايىمدى جەرلەۋ راسىمىنە قاتىستى. ءبىزدىڭ ەل دەلەگاتسياسىنىڭ قۇرامىندا سىرتقى ىستەر ءمينيسترىنىڭ ورىنباسارى رومان ۆاسيلەنكونىڭ بولعانىن دا اتاپ وتكەن ءجون. راسىمگە 2000-عا جۋىق مەيمان قاتىستى. ولاردىڭ قاتارىندا كورولدىك وتباسىنىڭ مۇشەلەرى، مەملەكەت جانە ۇكىمەت باسشىلارى، ديپلوماتتار مەن قوعام وكىلدەرى بار.
ايتا كەتەيىك، بۇعان دەيىن قازاقستان پرەزيدەنتى قاسىم-جومارت توقاەۆ كورول ءىىى چارلزگە كوڭىل ايتۋ جەدەلحاتىن جولدادى. وندا مەملەكەت باسشىسى قازاقستان حالقىنىڭ جانە جەكە ءوزىنىڭ اتىنان كورولدىڭ، كورولدىك وتباسى مەن بارلىق بريتاندىقتىڭ قايعىسىنا ورتاقتاسىپ، كوڭىل ايتتى. سونداي-اق ەل پرەزيدەنتى ۇلىبريتانيانىڭ قازاقستانداعى ەلشىلىگىنە بارىپ، كوڭىل ايتۋ كىتابىنا جازبا قالدىردى.
"ادىرنا" ۇلتتىق پورتالى
