اقمولا وبلىسى زەرەندى اۋدانىنا قاراستى ەلەنوۆكا اۋىلىنىڭ اتاۋى سامالتاۋ بولىپ وزگەرتىلدى. بۇل تۋرالى اقىن مەرگەن توقسانباي جازدى، دەپ حابارلايدى «ادىرنا» ءتىلشىسى.
ايتۋىنشا، وزگە ۇلت وكىلدەرى اۋىل اتاۋىنىڭ وزگەرۋىنە قارسىلىق تانىتقان. دەسە دە، اتاۋدى قازاقشالاۋدى قولداعاندار باسىم تۇسكەن.
«بۇگىن ەلەنوۆكا اۋىلىنىڭ اتىن اۋىستىرۋعا ارنالعان جينالىس بولدى. بۇل جەردىڭ تاريحي اتاۋى - سامالتاۋ!
حالىقارالىق "قازاق ءتىلى" قوعامى اقمولا وبلىستىق فيليالىنىڭ توراعاسى ەرمەك نۋگمانوۆ اعام ۇلتتىق مۇددە، ونوماستيكا ماسەلەلەرى جونىندە ءسوز سويلەي باستاپ ەدى، ادەتتەگىدەي ورىس اپايلار شۋلاپ قويا بەردى.
ايتەۋىر، بۇل جولى جالعىز بارعام جوق، كوكشەتاۋدان نۇريسلام ءابدىل ، ماناربەك قىدىربايۇلى ، باحتيار يسماگۋلوۆ ، ابىلايحان ءاشىمحان ، ورالبەك ءنۇرۇش ، دۋمان سامات باۋىرلارىم بارعان، ولار دا ايتىسىپ-تارتىسىپ، الماس اعام كۇنى-ءتۇنى ىزدەنىپ ارحيۆ پەن ەسكى كىتاپتاردان، گازەت-جۋرنالداردان تاپقان دەرەكتەرىن العا تارتىپ، اقىرى داۋىسقا سالىپ، اۋىل اتىن قازاقشالايمىز دەگەندەر باسىم ءتۇستى. ءبىزدىڭ جىگىتتەر سول جينالىستىڭ حاتتاماسىن جازىپ، ورىسشاعا اۋدارىپ، قول قويىپ، ءمور باسىپ ءبىر-اق كەتتىك. ورىستاردىڭ ىعىنا جىعىلىپ حاتتاما تەرىس تولتىرىلماسىن دەپ ساقتانعان ءتۇرىمىز عوي.
ال، اعايىن، سامالتاۋ قايىرلى، قۇتتى بولسىن! قازاق ەلىنە + 1 قازاقشا اۋىل!»—دەدى ول.
