پاۆلوداردا جول اپاتىنان اۋىر جاراقات العان 60 جاستاعى ايەل اۋرۋحانادا 10 كۇننەن كەيىن قايتىس بولدى. كولىكتى پروكۋراتۋرا قىزمەتكەرى باسقارعان دەگەن اقپارات تارادى، دەپ حابارلايدى "ادىرنا".
مارقۇمنىڭ نەمەرەسى الينانىڭ ايتۋىنشا، اجەسى گالينا سەيتباتالوۆا 23 تامىزدا كوز جۇمعان. وتباسى 3 قازاندا مارقۇمنىڭ قىرقىن وتكىزگەن.
جول اپاتى 13 تامىزدا پاۆلودارداعى نۇرماعامبەتوۆ پەن كامزين كوشەلەرىنىڭ قيىلىسىندا بولعان. ايەل سول كۇنى جۇمىستان ۇيىنە قايتىپ بارا جاتقان. ول جەرگىلىكتى بازارداعى كيىم دۇكەنىندە جۇمىس ىستەگەن. اپات سالدارىنان ايەل باس سۇيەك-مي جاراقاتىن الىپ، باسىنان اۋىر جاراقاتتانعان. سونىمەن قاتار قابىرعاسى مەن بۇعاناسى سىنعان. مارقۇمنىڭ نەمەرەسى جول-كولىك وقيعاسىن ەكى ادامنىڭ كورگەنىن ايتتى. ونىڭ سوزىنشە، جىگىت پەن قىز اجەسىمەن بىرگە جولدان ءوتىپ بارا جاتقان.
وقيعاعا پروكۋراتۋرا قىزمەتكەرىنىڭ قاتىسى بار ەكەنىن پاۆلودار پروكۋراتۋراسى راستادى. قازىرگى تاڭدا اتالعان دەرەك بويىنشا قىلمىستىق كودەكستىڭ 345-بابىنىڭ 2-بولىگىمەن قىلمىستىق ءىس تەرگەلىپ جاتىر.
الينا ءىستىڭ قوعامعا جاريا بولعاننان كەيىن تەرگەۋشىنىڭ اۋىسقانىن جانە وسىدان سوڭ تەرگەۋ جۇمىستارى جاندانعانىن ايتتى. ونىڭ مالىمەتىنشە، بىرنەشە ساراپتاما جۇرگىزىلىپ، قازىر ولاردىڭ ناتيجەسى كۇتىلىپ وتىر. وتباسى ءىستى جۇرگىزۋ ءۇشىن ادۆوكات جالداعان.
تەرگەۋدى پاۆلودار وبلىسىنىڭ پوليتسيا دەپارتامەنتى جۇرگىزىپ جاتىر. قىلمىستىق ءىس بويىنشا بارلىق ءمان-جاي انىقتالۋدا.
