فوتو: EPA
كينورەجيسسەر يليا حرجانوۆسكي ۆەنەتسيا حالىقارالىق كينوفەستيۆالىندە «ۇزدىك رەجيسسەر» نوميناتسياسى بويىنشا «كۇمىس ارىستان» جۇلدەسىنە يە بولدى. ول بۇل ماراپاتتى بىرنەشە جىل بۇرىن تۇسىرىلگەن «داۋ» ارت-جوباسى ءۇشىن الدى. بۇل تۋرالى ۆۆس جازدى، دەپ حابارلايدى “ادىرنا”.
ماسكەۋدە دۇنيەگە كەلگەن رەجيسسەر ماراپاتىن حاركوۆ تۇرعىندارىنا ارنادى. حرجانوۆسكي رەسەي بيلىگى «شەتەلدىك اگەنت» دەپ تانىعان تۇلعالاردىڭ قاتارىندا.
«مەن بۇل ماراپاتتى حاركوۆقا جانە وسى سۇراپىل سوعىستا بوستاندىق، بەيبىتشىلىك پەن جەڭىس ءۇشىن كۇرەسىپ جاتقان ۋكراينالىقتارعا ارناعىم كەلەدى. مەن ولارعا سەنەمىن»، – دەدى رەجيسسەر ماراپاتتاۋ راسىمىندە.
«داۋ» جوباسى كەڭەستىك فيزيك لەۆ لانداۋ مەن ونىڭ ارىپتەستەرىنىڭ ومىرىنە ارنالعان. فيلم بىرنەشە جىل بويى ءتۇسىرىلىپ، جوبا ءۇشىن حاركوۆتا اۋقىمدى دەكوراتسيالار سالىنعان. تۇسىرىلىمگە مىڭداعان ادام قاتىستى.
باستاپقىدا تۇسىرىلگەن ماتەريالداردان 13 ءتۇرلى فيلم قۇراستىرىلعان. ال ۆەنەتسيا كينوفەستيۆالى ءۇشىن رەجيسسەر ولاردىڭ نەگىزىندە ءتورت ساعاتتىق ءبىر نۇسقاسىن ازىرلەگەن.
الايدا «داۋ» جوباسىنىڭ فەستيۆال باعدارلاماسىنا ەنگىزىلۋىنە ۋكراينا سىرتقى ىستەر مينيسترلىگى مەن مادەنيەت مينيسترلىگى قارسىلىق ءبىلدىردى. ۋكراينا تاراپى فيلمدە حاركوۆتىڭ «كەڭەستىك كوزقاراس ارقىلى» كورسەتىلەتىنىن ايتىپ، جوبانى رەسەيلىك ناسيحاتتىڭ ءبىر بولىگى رەتىندە باعالادى.
ۆەنەتسيا كينوفەستيۆالىنىڭ باستى جۇلدەسى – «التىن ارىستان» دات رەجيسسەرى ماي ەل-تۋكيدىڭ «بەلگىسىز ايەل»فيلمىنە بەرىلدى.
«ۇزدىك اكتەر» اتالىمىنداعى «كۇمىس ارىستاندى» امەريكالىق اكتەر دجون مالكوۆيچ الدى. ول «Wild Horse Nine» فيلمىندەگى ءرولى ءۇشىن ماراپاتتالدى.
«ۇزدىك اكتريسا» جۇلدەسىنە دات اكتريساسى ماتيلدا ارسەل يە بولدى. ول «بەلگىسىز ايەل» فيلمىندەگى رولىمەن كوزگە ءتۇستى.
قازىلار القاسى ارنايى جۇلدەنى يزرايلدىك رەجيسسەرلەر يۋۆال اۆراھام مەن راحەل شوردىڭ يزرايل مەن حاماس اراسىنداعى گازا سەكتورىنداعى سوعىس تۋرالى تۇسىرگەن NAZA دەرەكتى فيلمىنە تابىستادى.
