قازاقستاندا 25 تامىزدان باستاپ "جول ءجۇرىسى تۋرالى" زاڭعا ەنگىزىلگەن وزگەرىستەر كۇشىنە ەنەدى، دەپ حابارلايدى "ادىرنا".
وسىعان بايلانىستى بۇگىن، 22 شىلدەدە، قازاقستان رەسپۋبليكاسى ىشكى ىستەر مينيسترلىگى زاڭناماداعى وزگەرىستەرگە تۇسىنىكتەمە بەرىپ، جۇرگىزۋشىلەرگە ماڭىزدى ۇندەۋ جاسادى.
ەڭ الدىمەن، 65 جاستان اسقان جۇرگىزۋشىلەر مەن مۇگەدەكتىگى بار جۇرگىزۋشىلەر ەكى جىلدا ءبىر رەت مىندەتتى مەديتسينالىق تەكسەرۋدەن ءوتۋ قاجەت ەكەنىن ەسكە سالامىز. مىندەتتى مەديتسينالىق تەكسەرۋدەن وتكەنى تۋرالى مالىمەتتەر دەنساۋلىق ساقتاۋ مينيسترلىگى مەن ىشكى ىستەر مينيسترلىگى اراسىندا اۆتوماتتى تۇردە الماسادى.
"ەگەر مەملەكەتتىك اقپاراتتىق جۇيەدە جۇرگىزۋشىنىڭ مەديتسينالىق تەكسەرۋدەن وتكەنى جانە كولىك قۇرالىن باسقارۋعا قارسى كورسەتىلىمدەرىنىڭ جوقتىعى راستالماسا، كولىك قۇرالىن باسقارۋ قۇقىعى توقتاتىلادى. بۇل تالاپ تەك 65 جاستان اسقان جۇرگىزۋشىلەر مەن مۇگەدەكتىگى بار جۇرگىزۋشىلەرگە عانا قاتىستى ەكەنىن ەرەكشە اتاپ وتەمىز. كەلەسى وزگەرىس جول ءجۇرىسى قاعيدالارىن ءبىلۋ دەڭگەيىن قايتا تەكسەرۋگە قاتىستى", - دەيدى ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.
زاڭدا كوزدەلگەن جاعدايلاردا جولدا ءجۇرۋ قاعيدالارىن ورەسكەل بۇزعان جۇرگىزۋشىلەر قايتادان تەوريالىق ەمتيحان تاپسىرۋعا جىبەرىلۋى مۇمكىن. مىسالى، جول قيىلىسىنان ءوتۋ كەزىندە اپاتتىق جاعداي تۋعىزۋ، بەلگىلەنگەن جىلدامدىقتى بىرنەشە رەت اسىرۋ، مانەۆر جاساۋ، جولاق اۋىستىرۋ نەمەسە باسىپ وزۋ قاعيدالارىن قاۋىپتى تۇردە بۇزۋ سياقتى ورەسكەل قۇقىق بۇزۋشىلىقتار.
"بۇل تالاپ بارلىق جۇرگىزۋشىگە ەمەس، تەك زاڭدا ناقتى كوزدەلگەن جاعدايلاردا عانا قولدانىلادى. ەگەر جۇرگىزۋشى دالەلدى سەبەپسىز ءتيىستى قاۋلىنى العان كۇننەن باستاپ ەكى اي ىشىندە تەوريالىق ەمتيحانعا كەلمەسە، بۇل دا كولىك قۇرالىن باسقارۋ قۇقىعىن توقتاتۋعا نەگىز بولادى", - دەدى اقتوتى بورانوۆا.
سونىمەن قاتار، الكوگولدىك، ەسىرتكىلىك ماساڭ كۇيدە كولىك باسقارعانى ءۇشىن جۇرگىزۋشىلەرگە جاۋاپكەرشىلىك كۇشەيتىلدى. ەندى قىلمىستىق ءىس جابىرلەنۋشىمەن تاتۋلاسۋىنا بايلانىستى توقتاتىلعاننىڭ وزىندە، قۇقىق بۇزۋشى سەگىز جىلعا كولىك قۇرالىن باسقارۋ قۇقىعىنان ايىرىلادى.
بۇل وزگەرىستەردىڭ بارلىعى جول ءجۇرىسى قاۋىپسىزدىگىن ارتتىرۋعا، ازاماتتاردىڭ ءومىرى مەن دەنساۋلىعىن قورعاۋعا باعىتتالعان.
