كونگو دەموكراتيالىق رەسپۋبليكاسىندا ەبولا ۆيرۋسىنان قايتىس بولعاندار سانى ارتىپ كەلەدى، دەپ حابارلايدى "ادىرنا" ۇلتتىق پورتالى.
تاسس دەرەگىنشە، سوڭعى ءبىر تاۋلىكتە ەبولا ۆيرۋسىنان تاعى 37 ادام كوز جۇمعان. وسىلايشا، زەرتحانالىق تۇردە راستالعان ءولىم-ءجىتىم سانى 967-گە جەتتى. سونداي-اق ەلدە ەبولا جۇقتىرعانداردىڭ جالپى سانى 2 423 ادامدى قۇرادى. بۇل الدىڭعى تاۋلىكپەن سالىستىرعاندا 79 جاعدايعا كوپ. قازىر اۋرۋدىڭ ءولىم-ءجىتىم دەڭگەيى 39,9%-دى قۇراپ وتىر.
رەسمي مالىمەتكە سايكەس، اۋرۋحانالار مەن وقشاۋلاۋ ورتالىقتارىندا 734 ناۋقاس ەم قابىلداپ جاتىر. بۇدان بولەك، ۆيرۋس جۇقتىرعاندارمەن بايلانىستا بولعان ادامداردى باقىلاۋ كورسەتكىشى 81,1%-عا جەتكەن.
بۇعان دەيىن دۇنيەجۇزىلىك دەنساۋلىق ساقتاۋ ۇيىمى (ددسۇ) كونگو دەموكراتيالىق رەسپۋبليكاسىنداعى ەبولا ىندەتىنە قاتىستى ەپيدەميولوگيالىق جاعدايدىڭ كۇردەلەنە تۇسكەنىن مالىمدەگەن بولاتىن. ۇيىم جۇقتىرۋ جاعدايلارىنىڭ كوبەيۋىنە، ىندەتپەن كۇرەسكە بولىنەتىن قارجىنىڭ جەتكىلىكسىزدىگىنە جانە شۇعىل الدىن الۋ شارالارىن كۇشەيتۋ قاجەتتىگىنە نازار اۋدارعان.
