چادتىڭ شىعىسىنداعى يگوتە اۋدانىندا ەكى وتباسى اراسىندا سۋعا قول جەتكىزۋ ماسەلەسىنە بايلانىستى جانجال تۋىنداپ، كەمىندە 42 ادام قازا تاپتى. بۇل تۋرالى Tchad Infos جازدى، دەپ حابارلايدى «ادىرنا» ءتىلشىسى.
قاقتىعىس سالدارىنان تاعى 10 ادام جاراقات الىپ، اۋرۋحاناعا جەتكىزىلگەن.
«ۆيتسە-پرەمەر ليمانە ماحاماتتىڭ ايتۋىنشا، بۇل – “قاۋىمدار اراسىنداعى ءداستۇرلى قاقتىعىس ەمەس”، سۋ كوزىنىڭ ماڭىندا باستالعان ەكى وتباسى اراسىنداعى جانجال. كەيىن ول ءوزارا كەك الۋ ارەكەتتەرىنىڭ تىزبەگىنە ۇلاسقان»، — دەلىنگەن حابارلامادا.
ماحامات داۋدى شەشۋ ءۇشىن ماماندار تارتىلاتىنىن ايتىپ، سۋدانمەن شەكتەسەتىن ايماقتىڭ تۇراقسىزدانۋ قاۋپىنەن ساقتاندىردى.
Tchad Info مالىمەتىنشە، ەلدىڭ شىعىس پروۆينتسيالارى سۋدانداعى سوعىستان قاشقان بوسقىنداردى قابىلداپ جاتىر. سونىڭ سالدارىنان رەسۋرستار تاپشىلىعى مەن قاۋىپسىزدىك ماسەلەلەرىنە بايلانىستى شيەلەنىس كۇشەيگەن.
چادتا جەر، مال جانە سۋعا قولجەتىمدىلىككە بايلانىستى قاۋىمدار اراسىندا جانجالدار ءجيى بولىپ تۇرادى. ماسەلەن، وتكەن جىلدىڭ قاراشا ايىندا حادجەر-لاميس پروۆينتسياسىندا ەكى ەلدى مەكەن اراسىنداعى قۇدىققا قاتىستى داۋدان 33 ادام قازا تاپقان.
