فوتو: داۋرەن ماقسۇتحانۇلى، دوسجان بالابەكۇلى.
الماتىدا «ۇلى دالا كەرەمەتتەرى» ەتنو-فوتوكورمەسى ءوتتى. ناۋرىز مەرەكەسىنە وراي ۇيىمداستىرىلعان بۇل اۋقىمدى مادەني جوبا 21 ناۋرىزدا باستالىپ، 23 ناۋرىزعا دەيىن جالعاستىى.
كورمە الماتى قالاسى مۋزەيلەر بىرلەستىگى مەن «فوتوونەر» قوعامدىق بىرلەستىگى تاراپىنان، الماتى قالالىق مادەنيەت باسقارماسىنىڭ قولداۋىمەن ۇيىمداستىرىلعان.
اتالعان جوبا بىرنەشە ماڭىزدى مەرەيتويلار مەن اتاۋلى كۇندەر اياسىندا جۇزەگە استى. اتاپ ايتقاندا، فوتوگرافيا ونەرىنىڭ پايدا بولعانىنا 200 جىل تولۋى، قازاقستان رەسپۋبليكاسى تاۋەلسىزدىگىنىڭ 35 جىلدىعى جانە ۇلىستىڭ ۇلى كۇنى – ناۋرىز مەيرامى كورمەنىڭ نەگىزگى تاقىرىپتىق وزەگىن قۇرايدى.
ەتنو-فوتوكورمە ۇلتتىق مۇرانى زاماناۋي كوركەمدىك تاسىلدەر ارقىلى تانىستىرۋدى ماقسات ەتەدى. جوبا تاريحي ساباقتاستىق، رۋحاني جاڭعىرۋ جانە ۆيزۋالدى مادەنيەتتىڭ دامۋىن ءوزارا بايلانىستىرا وتىرىپ، كورەرمەنگە تىڭ كوزقاراس ۇسىنادى.
رەسپۋبليكالىق دەڭگەيدە ۇيىمداستىرىلعان كورمەگە الماتى، استانا، شىمكەنت قالالارى مەن وزگە وڭىرلەردەن 30-دان استام تانىمال فوتوگرافتار مەن فوتوجۋرناليستەر قاتىسۋدا. ولاردىڭ قاتارىندا قازاقستاننىڭ ەڭبەك سىڭىرگەن قايراتكەرلەرى، مەملەكەتتىك قۇرىلىمداردىڭ رەسمي فوتوگرافتارى، سونداي-اق ۇلتتىق جانە كاسىبي سىيلىقتاردىڭ لاۋرەاتتارى بار.
كورمەدە الدىن الا ىرىكتەۋدەن وتكەن 100-گە جۋىق ەتنوگرافيالىق فوتوتۋىندى ۇسىنىلعان. بۇل جۇمىستار قازاق حالقىنىڭ تۇرمىس-تىرشىلىگىن، سالت-ءداستۇرىن جانە ۇلى دالانىڭ كوركەم بەينەسىن كەڭىنەن پاش ەتەدى.
ايتا كەتەيىك، فوتوگرافيا تاريحى 1826 جىلدان باستاۋ الادى. سول جىلى فرانتسۋز ونەرتاپقىشى جوزەف نيسەفور نەپس العاشقى تۇراقتى فوتوبەينەنى ءتۇسىرىپ، جاڭا ونەر ءتۇرىنىڭ نەگىزىن قالاعان بولاتىن. سودان بەرى فوتوگرافيا ۋاقىتتى «توقتاتاتىن» ەرەكشە قۇرال رەتىندە ادامزات مادەنيەتىندە ماڭىزدى ورىن الىپ كەلەدى.
ۇيىمداستىرۋشىلاردىڭ ايتۋىنشا، ناۋرىز – تابيعاتتىڭ جاڭارۋىن بىلدىرسە، فوتوگرافيا – ادام جادىن جاڭعىرتاتىن ونەر. وسى ەكى ۇعىمنىڭ ۇيلەسىمى كورمەنىڭ باستى يدەياسى رەتىندە ۇسىنىلدى.
