14–16 قازان ارالىعىندا الماتى قالاسىندا «بيولوگيالىق قاۋىپسىزدىك پەن قورعانىس بولاشاعى» اتتى حالىقارالىق كونفەرەنتسيا ءوتتى.
س-شاراعا 20-دان استام ەلدەن 150-دەن استام ساراپشى قاتىستى. كونفەرەنتسيانى حالىقارالىق عىلىمي-تەحنيكالىق ورتالىق (حعتو) پەن ورتالىق ازيا مەن كاۆكازداعى بيولوگيالىق قاۋىپسىزدىك قاۋىمداستىعى (اكبقق) GIZ ۇيىمىنىڭ، قر سىرتقى ىستەر جانە دەنساۋلىق ساقتاۋ مينيسترلىكتەرىنىڭ قولداۋىمەن ۇيىمداستىردى.
كونفەرەنتسيا بارىسىندا قاتىسۋشىلار عىلىم، تەحنولوگيا جانە جاھاندىق قاۋىپسىزدىك سالاسىنداعى تاۋەكەلدەر مەن مۇمكىندىكتەردى تالقىلادى. اسىرەسە بيولوگيالىق قاۋىپسىزدىك پەن بيوتەحنولوگيا سالاسىندا جاساندى ينتەللەكتىنى (AI) پايدالانۋ، كليماتتىڭ وزگەرۋىنەن تۋىندايتىن قاۋىپتەر، سونداي-اق عىلىمي يننوۆاتسيالاردى جاۋاپكەرشىلىكپەن قولدانۋدىڭ ماڭىزى ايتىلدى.
فورۋمدى حعتو اتقارۋشى ديرەكتورى كارينا انگەليەۆا، قر سىرتقى ىستەر مينيسترلىگىنىڭ حالىقارالىق قاۋىپسىزدىك دەپارتامەنتىنىڭ ديرەكتورى ارمان بايسۋانوۆ، اكبقق پرەزيدەنتى داميرا اشراليەۆا جانە GIZ باعدارلامالىق ديرەكتورى كاتارينا نيدەرحۋت اشتى.
بايانداماشىلار اراسىندا اقش، فرانتسيا، كانادا، جاپونيا، نورۆەگيا، پاكىستان، گرۋزيا، ۋكراينا، قىرعىزستان جانە تاجىكستاننان كەلگەن بەدەلدى عالىمدار بولدى.
ماڭىزدى شارالاردىڭ ءبىرى — دوكتور ستەفان ۆاگنەر (BRMI) جۇرگىزگەن «جاساندى ينتەللەكت جانە بيولوگيالىق تاۋەكەلدەردى باسقارۋ» سەمينارى. وندا AI تەحنولوگيالارىنىڭ بيولوگيالىق عىلىمداعى قولدانىلۋ تاۋەكەلدەرى مەن مۇمكىندىكتەرى قاراستىرىلدى.
ەكى كۇندىك پىكىرتالاستىڭ قورىتىندىسى رەتىندە قاتىسۋشىلار «الماتىدان ارەكەتكە شاقىرۋ» اتتى ستراتەگيالىق جول كارتاسىن قابىلدادى. قۇجاتتا مەملەكەت، عىلىم جانە جەكە سەكتور اراسىنداعى ىنتىماقتاستىقتى كەڭەيتۋ، بيوقاۋىپسىزدىك سالاسىنداعى اشىقتىق پەن جاۋاپكەرشىلىكتى ارتتىرۋ مىندەتى بەلگىلەندى.
كونفەرەنتسيا بيولوگيالىق قارۋ تۋرالى كونۆەنتسيانىڭ 50 جىلدىعىنا جانە حعتو-نىڭ قازاقستاندا 10 جىل جۇمىس ىستەۋىنە ارنالدى.
حعتو اتقارۋشى ديرەكتورى كارينا انگەليەۆا ءوز سوزىندە:
ديالوگ پەن تاجىريبە الماسۋ ارقىلى ءبىز عىلىم مەن قاۋىپسىزدىك اراسىنداعى كوپىردى نىعايتىپ، بەيبىتشىلىك پەن دامۋعا ۇلەس قوسامىز، - دەدى.
اكبقق پرەزيدەنتى داميرا اشراليەۆا دا ءوز سوزىندە:
“الماتىدان ارەكەتكە شاقىرۋ” — بيوتەحنولوگيا مەن جاساندى ينتەللەكت سالاسىنداعى ۇجىمدىق جاۋاپكەرشىلىككە ناقتى قادام، - دەپ اتاپ ءوتتى.
ءىس-شارانى ەۋروپالىق وداقتىڭ وزىق تاجىريبەلەر ورتالىعى باستاماسى جانە نەمىس بيوقاۋىپسىزدىك باعدارلاماسى شەڭبەرىندە بىرقاتار حالىقارالىق ۇيىمدار قولدادى.
