“قايرات” فۋتبول كلۋبى الەۋمەتتىك جەلىلەردە تاراعان بيلەتتەردىڭ ساتىلىمى مەن بروندالۋىنا قاتىستى اقپاراتتىڭ شىندىققا جاناسپايتىنىن مالىمدەدى، دەپ حابارلايدى "ادىرنا" ۇلتتىق پورتالى.
كلۋبتىڭ مالىمدەۋىنشە، جانكۇيەرلەردى شاتاستىرىپ جۇرگەن حابارلامالار جالعان.
"بيلەتتەرگە قاتىستى رەسمي اقپارات تەك “قايراتتىڭ” رەسمي سايتىندا جانە الەۋمەتتىك جەلىدەگى رەسمي پاراقشالارىندا عانا جاريالانادى. قازىرگى ۋاقىتتا بيلەتتەردىڭ ساتىلىمعا شىعۋ كۇنى مەن باعاسى بەكىتىلگەن جوق. سوندىقتان جانكۇيەرلەرگە بەيرەسمي ارنالار ارقىلى بيلەت الۋدان باس تارتۋدى سۇرايمىز" – دەلىنگەن حابارلامادا.
ەسكە سالايىق، جۋىردا “قايراتتىڭ” ليگا چەمپيوندارى جولىنداعى “سەلتيككە” قارسى شەشۋشى ويىنىنا بيلەتتەر ءبىر اپتا بۇرىن ساتىلىمعا شىعارىلىپ، ءبىر جارىم ساعاتتا تۇگەل ساتىلىپ كەتكەن ەدى. كلۋبتىڭ دەرەگىنشە، سول كەزدە سايتقا 100 مىڭنان استام ءوتىنىم تۇسكەن.
ساراپشىلاردىڭ بولجاۋىنشا، “رەال مادريدكە” قارسى ماتچ بيلەتتەرىنە سۇرانىس بۇدان دا جوعارى بولۋى مۇمكىن.
