ەڭ بەدەلدى حالىقارالىق پاندىك وليمپيادالاردا قازاقستاندىق وقۋشىلار 3 التىن، 13 كۇمىس جانە 7 قولا مەدال جەڭىپ الدى، دەپ جازادى "ادىرنا" ۇلتتىق پورتالى.
ياعني ارالىق قورىتىندى بويىنشا ۇلتتىق قۇراما قورجىنىندا 6 ءپان بويىنشا 23 مەدال بار.
ماتەماتيكادان حالىقارالىق وليمپيادادا (IMO) قازاقستان قۇراماسى 3 كۇمىس جانە 3 قولا مەدال جەڭىپ العانىن ەسكە سالا كەتەيىك. كوماندامىز 174 ۇپاي جيناپ، ەلىمىزدىڭ وليمپياداعا قاتىسۋ تاريحىنداعى جاڭا رەكوردىن ورناتتى. بۇل سوڭعى 12 جىلداعى ۇزدىك ناتيجە بولدى.
فيزيكادان حالىقارالىق وليمپيادادا وقۋشىلارىمىز 1 التىن، 4 كۇمىس مەدالعا يە بولدى. بۇل سوڭعى 8 جىلداعى ەڭ جاقسى كورسەتكىش. بىلتىر ۇلتتىق قۇراما قورجىنىنا 5 كۇمىس مەدال تۇسكەن بولاتىن.
گەوگرافيادان وتكەن حالىقارالىق وليمپيادادا وقۋشىلارىمىز ەكىنشى جىل قاتارىنان التىن مەدال جەڭىپ الدى. بيىل دا 1 قولا مەدالعا يە بولدىق.
بيولوگيادان حالىقارالىق وليمپياداعا قاتىسۋشىلار 3 كۇمىس جانە 1 قولا جەڭىپ الىپ، بىلتىرعى ناتيجەلەرىن جاقسارتتى. وتكەن جىلى 1 كۇمىس جانە 2 قولا مەدال، سونداي-اق 1 قۇرمەت گراموتاسىن جەڭىپ العان بولاتىن.
زياتكەرلىك سايىسقا قاتىسقان جاس حيميكتەرىمىزدىڭ دە جوعارى دەڭگەيدە ونەر كورسەتتى. ولار 1 التىن جانە 3 كۇمىس جەڭىپ الدى. ونىڭ ۇستىنە بۇل 2017 جىلدان بەرگى العاشقى التىن بولدى.
سونىمەن قاتار قازاقستاندىق وقۋشىلار لينگۆيستيكادان حالىقارالىق وليمپيادادا العاش رەت 2 قولا مەدال جەڭىپ الدى.
«الداعى ۋاقىتتا ينفورماتيكادان حالىقارالىق وليمپيادا وتەدى. مەن وقۋشىلارىمىزدىڭ حالىقارالىق وليمپيادادا ەل نامىسىن ابىرويمەن قورعايتىنىنا سەنىمىم مول. وليمپياداعا قاتىسۋشىلار مەن جۇلدەگەرلەرگە قاجىرلى ەڭبەكتەرى، كۇش-جىگەرلەرى مەن تاباندىلىقتارى ءۇشىن العىس ايتامىن. كۇندەلىكتى جۇمىسى جانە جوعارى كاسىبيلىگى ءۇشىن ارىپتەستەرىمە دە راحمەت ايتقىم كەلەدى. بيىل پرەزيدەنتتىڭ قولداۋىنىڭ ارقاسىندا العاش رەت وقۋشىلارىمىز 4,5 ملن تەڭگەگە دەيىن قوماقتى اقشالاي سىياقىعا جانە ۇبت-دان وتپەي-اق قازاقستاندىق جوعارى وقۋ ورىندارىندا وقۋ ءۇشىن گرانتقا يە بولادى. التىن مەدال العان وقۋشىعا 1 500 اەك، كۇمىس مەدالعا 1 000 اەك، قولا مەدالعا 500 اەك كولەمىندە اقشالاي سىيلىق بەرىلەدى. وقۋشىلاردى جارىسقا دايىنداعان ۇستازدار دا بىرجولعى سىياقى الادى»، - دەدى وقۋ-اعارتۋ ءمينيسترى اسحات ايماعامبەتوۆ.
"ادىرنا" ۇلتتىق پورتالى
