ريو-دە-جانەيرونىڭ سولتۇستىگىندەگى برازيليالىق Complexo do Alemão اۋماعىندا پوليتسيانىڭ كولىك ۇرىلار توبىنا قارسى ارنايى وپەراتسياسى كەزىندە اتىس بولىپ، 18 ادام قازا تاپتى، - دەپ حابارلايدى"ادىرنا" ءتىلشىسى Globo TV ارناسىنا سىلتەمە جاساپ.
حابارلانعانداي، قاراقشىلار ءتارتىپ ساقشىلارىنا قارۋلى قارسىلىق كورسەتكەن. اتىس كەزىندە 18 ادام قازا تاپتى، ولاردىڭ 16-سى قىلمىسكەرلەر توبىنان، ءبىر پوليتسيا قىزمەتكەرى جانە كولىكپەن ءوتىپ بارا جاتقان 50 جاستاعى ايەل كەزدەيسوق وقتىڭ قۇربانى بولدى.
پوليتسيا وپەراتسيالىق باتالونىنىڭ (BOPE) كومانديرى ۆيرا ناسيمەنتونىڭ ايتۋىنشا، باندانىڭ كەيبىر مۇشەلەرى ازاماتتىق اسكەري پوليتسيا كيىمىن كيگەن. ارنايى وپەراتسيانى بۇزۋ ءۇشىن ولار قاراپايىم ازاماتتاردى دا پايدالانعان.
«قىلمىسكەرلەر پوليتسيانىڭ وپەراتسياسى كەزىندە حالىقتىڭ ءبىر بولىگىن تارتىپسىزدىككە ماجبۇرلەۋدە»، - دەدى ناسيمەنتو.
ازاماتتىق پوليتسيانىڭ ارنايى رەسۋرستاردى ۇيلەستىرۋشىسى فابريسيو وليۆەيرا كوپتەگەن ادامداردىڭ، سونىڭ ىشىندە ۇيىمداسقان قىلمىستىق توپقا قاتىسى جوقتاردىڭ ولىمىنە اكەلگەن بۇل وقيعانىڭ تەرگەلەتىنىن ايتتى.
بۇل ارنايى وپەراتسيا برازيليادا كوپ ادام قازا تاپقان ءتورتىنشى وپەراتسيا ەكەنى اتاپ ءوتىلدى. بۇعان دەيىن دجاكارەزينوداعى پوليتسيا رەيدىندە 28 ادام، ۆيلا كرۋزەيرودا ارنايى وپەراتسيا كەزىندە 25 ادام قازا تاپقان بولاتىن. 2007 جىلى پوليتسيا مەن قىلمىسكەرلەر اراسىنداعى اتىستا 19 ادام قازا تاپقان.