ەندى مەكتەپ وقۋشىلارى جازعى دەمالىسقا 1 ماۋسىمدا شىعادى. بۇل تۋرالى قر وقۋ-اعارتۋ مينيسترلىگى حابارلادى ، دەپ جازادى "ادىرنا" ۇلتتىق پورتالى.
وقۋ-اعارتۋ مينيسترلىگى مامانداردىڭ ۇسىنىستارى مەن عىلىمي زەرتتەۋلەرىنىڭ ناتيجەلەرىنە زەرتتەۋ جۇرگىزدى. وسىعان دەيىن ماماندار وقۋ جىلىن ماۋسىم ايىنىڭ سوڭىنا دەيىن ۇزارتۋ جانە وقۋ جىلىن 20 تامىزدان باستاۋ ماسەلەسىن قاراۋدى سۇراپ، مينيسترلىككە بىرنەشە رەت جۇگىنگەن بولاتىن.
ساراپشىلار قازاقستان الەمدەگى ەڭ ۇزاق كانيكۋل - 130 كۇن بولاتىن ەلدەردىڭ قاتارىنا كىرەتىنىن العا تارتتى. ال باسقا دا ەلدەردە كانيكۋل مەرزىمى 80-نەن 100 كۇنگە دەيىن. سونىمەن قاتار 5 كۇندىك وقۋ اپتاسىنا كوشكەن كەزدە وقۋ كۇندەرىنىڭ سانى بىردەن 34 كۇنگە ازايدى. وسىلايشا، ورتا ەسەپپەن العاندا، ءبىزدىڭ ەلىمىزدەگى وقۋ كۇندەرىنىڭ جالپى سانى شامامەن 150 كۇن بولسا، دامىعان ەلدەردە بۇل شامامەن 200 كۇن. سونداي-اق ماماندار قوسىمشا وقۋ اپتالارىنىڭ قوسىلۋى كۇندەلىكتى ساباقتىڭ سانىن، ياعني مۇعالىمنىڭ دە، وقۋشىنىڭ دا كۇندەلىكتى وقۋ جۇكتەمەسىن ازايتاتىنىن اتاپ ءوتتى. التى كۇندىك كوپتەگەن مەكتەپ جاڭا تالاپقا ساي بەس كۇندىك وقۋ اپتاسىنا اۋىسا الادى. بۇل پەداگوگتەر جۇمىسىنىڭ تيىمدىلىگىن ارتتىرىپ، وقۋشىلاردىڭ ماتەريالدى مەڭگەرۋىنە ىقپال ەتەدى. بۇل شەشىمدەر كۇردەلى تاقىرىپتاردى وقۋدىڭ قارقىنىن تومەندەتەدى، وقىلعان ماتەريالدى قايتالاۋعا جانە بەكىتۋگە ۋاقىت بەرەدى.
بۇل رەتتە وزگەرىستەر جازعى دەمالىسقا اسەر ەتپەيتىنىن ءتۇسىنۋ ماڭىزدى. ياعني بالالار 1 ماۋسىم مەن 1 قىركۇيەك ارالىعىندا دەمالادى.
«وقۋ جىلىن ۇزارتۋدى قولداۋشىلار 4-توقساندى 20-25 ماۋسىمعا دەيىن سوزۋدى جانە وقۋدى 20 تامىزدان باستاۋدى ۇسىنىپ وتىر. ماماندار بىرنەشە جىلدان بەرى دابىل قاعىپ، وقۋشىلارىمىزدىڭ جازعى ۋاقىتتارىن كومپيۋتەر مەن سمارتفونداردا ويىن ويناۋمەن وتكىزىپ جاتقاندا، ولاردىڭ قاتارلاستارى ءبىلىم الىپ، وقىپ جاتقانىن ايتىپ كەلەدى. ولار بۇعان دەيىن دە ءوز دالەلدەرىن كەلتىرگەن بولاتىن. ءبىز عالىمدار، پسيحولوگتار، اتا-انالار مەن پەداگوگتەردەن قۇرالعان جۇمىس توبىن قۇردىق. حالىقارالىق تاجىريبە دە زەردەلەندى. جۇمىس توبى مامانداردىڭ ۇسىنىستارىن قولداماي، بالامالى ۇسىنىس ەنگىزدى: وقۋ جىلىنىڭ باستالۋ مەرزىمىن وزگەرتپەي، ونى بۇرىنعىداي 1 قىركۇيەكتە قالدىرۋ، ال وقۋ جىلىنىڭ اياقتالۋ مەرزىمىن 31 مامىرعا بەلگىلەۋ. وسىلايشا، كانيكۋلعا شىعۋدىڭ ايىرماشىلىعى نەبارى 5 كۇن بولادى. ال جاز باستالعاندا، ياعني 1 ماۋسىمنان باستاپ بالالار دەمالىسقا شىعا الادى. وسىلايشا، جاز بويى، ياعني 1 ماۋسىم مەن 1 قىركۇيەك ارالىعىندا بالالار كانيكۋلدا بولادى. بۇل ورايدا ءبىز ساپانى تەك وقۋ كۇندەرى ارقىلى عانا ەمەس، جالپى وقۋ جۇكتەمەسىن ازايتۋ، وقۋ باعدارلامالارىن جەتىلدىرۋ، مامانداردىڭ بىلىكتىلىگىن ارتتىرۋ جانە ت.ب. جولدار ارقىلى جاقسارتامىز. سونداي-اق، جاڭا وقۋ جىلىنان باستاپ مەكتەپتەردە اپتالىق وقۋ جۇكتەمەسىن ازايتۋ جوسپارلانىپ وتىر. ودان بولەك، وقۋ جىلىنىڭ ۇزاقتىعىن سوزۋ وقۋشىلارعا قوسىمشا بىلىمگە كوبىرەك ۋاقىت بولۋگە مۇمكىندىك بەرەدى، ويتكەنى ساباق از بولادى، مەكتەپتەردىڭ كابينەت قورىنا تۇسەتىن جۇكتەمە دە ازايادى»، - دەدى مەكتەپكە دەيىنگى جانە ورتا ءبىلىم كوميتەتى توراعاسى گۇلميرا كارىموۆا.
سالىستىرمالى تۇردە الىپ قارايتىن بولساق، گەرمانيا، انگليا جانە جاپونيادا جازعى دەمالىس 7 اپتا، پولشا، قىتاي جانە وڭتۇستىك كورەيادا 7-9 اپتا، فينليانديا، ۆەنگريا، شۆەتسيادا 9-11 اپتا، لاتۆيا، يتاليا جانە پورتۋگاليادا 11 اپتا، قازاقستاندا - 14 اپتاعا سوزىلادى.
"ادىرنا" ۇلتتىق پورتالى
