«بولاشاق» حالىقارالىق ستيپەندياسى 199 قازاقستاندىققا بەرىلدى

2234
Adyrna.kz Telegram

قازاقستان رەسپۋبليكاسىنىڭ مەملەكەتتىك كەڭەسشىسى ەرلان قاريننىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى. كوميسسيا شەشىمىمەن «بولاشاق» حالىقارالىق ستيپەندياسى 199 قازاقستاندىققا بەرىلدى. ولار ماگيستراتۋرا مەن دوكتورانتۋرادا وقيتىن بولادى، دەپ جازادى "ادىرنا" ۇلتتىق پورتالى. بۇل تۋرالى اقوردانىڭ رەسمي سايتى حابارلادى.

پرەزيدەنت قاسىم-جومارت توقاەۆتىڭ «بولاشاق» باعدارلاماسىن قايتا باعدارلاۋ جونىندەگى تاپسىرماسىنا سايكەس ينجەنەرلىك-تەحنيكالىق كادرلاردى دايارلاۋعا باسا ءمان بەرىلدى. ەگەر وتكەن جىلى ينجەنەرلىك-تەحنيكالىق ماماندىقتارعا 36% ستيپەنديا بولىنسە، بيىل 60% ءبولىندى.

سونىمەن قاتار، مەديتسينالىق باعىتتاعى اكادەميالىق باعدارلامالارعا ۇمىتكەرلەردىڭ قولجەتىمدىلىگىن جانە قىزىعۋشىلىعىن ارتتىرۋ ماقساتىندا رەسپۋبليكالىق كوميسسيا مەديتسينا قىزمەتكەرلەرىن اكادەميالىق وقىتۋ ءۇشىن جەكە سانات ءبولۋ تۋرالى شەشىم قابىلدادى. جالپى، بيىل ماگيستراتۋرا مەن رەزيدەنتۋرادا وقۋعا 385 ستيپەنديا، دوكتورانتۋرا باعدارلامالارى بويىنشا 60 ستيپەنديا ءبولىندى. وسى جىلدىڭ سوڭىنا دەيىن رەسپۋبليكالىق كوميسسيانىڭ تاعى ەكى وتىرىسى وتەدى.

«بولاشاق» حالىقارالىق ستيپەندياسىن تاعايىنداۋ كونكۋرسىنا قاتىسۋ ءۇشىن قۇجات قابىلداۋ بيىلعى 30 مامىردا باستالدى جانە 14 قازانعا دەيىن سوزىلادى. تاعىلىمدامادان ءوتۋ ءۇشىن قۇجات قابىلداۋ 2022 جىلعى 5 قىركۇيەكتە باستالىپ، 14 قازانعا دەيىن سوزىلادى. جيىن قورىتىندىسى بويىنشا ەرلان قارين بىرقاتار ناقتى تاپسىرما بەردى.

"ادىرنا" ۇلتتىق پورتالى 

پىكىرلەر