ءبىلىم ءمينيسترى اسحات ايماعامبەتوۆ "بولاشاق" باعدارلاماسىنىڭ تۇلەكتەرىمەن كەزدەستى، دەپ حابارلايدى "ادىرنا" ۇلتتىق پورتالى.
بۇل تۋرالى مينيستر ءوزىنىڭ ينستاگرام پاراقشاسىندا ءبولىستى.
ء"بىر جارىم ساعاتتان استام ۋاقىتقا سوزىلعان كەزدەسۋدە اتقارىلىپ جاتقان جۇمىستار تۋرالى، باعدارلامانى ودان ءارى جەتىلدىرۋ جانە قايتا باعدارلاۋ، قازىرگى ستيپەندياتتاردىڭ تاڭداۋى كوبىرەك بولۋى ءۇشىن ەلدەردىڭ گەوگرافياسى مەن ۋنيۆەرسيتەتتەر سانىن كەڭەيتۋ تۋرالى ايتتىم. سونداي-اق بولاشاقتىقتاردى قىزىقتىرعان ءتۇرلى سۇراقتارعا جاۋاپ بەردىم. الداعى جۇمىسىمىزدا نازارعا الاتىن قىزىقتى ۇسىنىستار دا ايتىلدى.
سونىمەن قاتار شەتەلدىك ۇزدىك وقۋ ورىندارىندا ءبىلىم الىپ، بۇگىندە وتانداستارىنا پايداسىن تيگىزىپ، ەل دامۋىنا ماڭىزدى ۇلەس قوسىپ جۇرگەن تۇلەكتەردىڭ اڭگىمەلەرىن تىڭداۋ دا قىزىقتى بولدى", — دەپ جازدى ول.
ءوز سوزىندە مينيستر بىرنەشە مىسالدار دا كەلتىردى.
"مىسالى، ديانا مومباەۆا كانادانىڭ جەتەكشى جوعارى وقۋ ورىندارىنىڭ ءبىرى كالگاري ۋنيۆەرسيتەتىندە "بولاشاق" باعدارلاماسى بويىنشا ءبىلىم الىپ، كەيىن قوستاناي وبلىسىنداعى تۋعان اۋىلى كومسومولعا ورالدى. ول قازىر اۋىلدىق مەكتەپتە تاريح پانىنەن ساباق بەرەدى. سونىمەن بىرگە ديانا بالالارعا اعىلشىن ءتىلىن دە تەگىن ۇيرەتەدى. جاس پەداگوگ كانادادان العان ءبىلىمىنىڭ ارقاسىندا اۋىلدا تۇرۋعا جانە دە اۋىلداستارىنىڭ ءومىرىن جاقسارتۋ ماقساتىندا قايتا ورالۋعا بولاتىنىن بالالاردىڭ وزىنە قاراپ، تۇسىنگەنىن قالايتىنىن ايتتى", — دەپ جازدى ا.ايماعامبەتوۆ.
ول قازىرگى تاڭدا قازاقستاندىق مەكتەپتەردە "بولاشاقتىڭ" ارقاسىندا الەمنىڭ جەتەكشى ۋنيۆەرسيتەتتەرىندە ءبىلىم العان 800-دەن استام مۇعالىم بالالارىمىزدى وقىتىپ جاتقانىن، 600-دەن استام دارىگەر جىل سايىن وتانداستارىمىزدىڭ ءومىرى مەن دەنساۋلىعىن ساقتاپ قالۋ ءۇشىن ون مىڭداعان وتا جاسايتىنىن جەتكىزدى.
"بولاشاق" باعدارلاماسى ارقىلى ءبىلىم العان پەداگوگتەردىڭ، دارىگەرلەردىڭ جانە باسقا دا ءتۇرلى ماماندىق وكىلدەرىنىڭ ەڭبەگى قوعامىمىز بەن ەلىمىزگە ماڭىزدى ءارى قاجەت. ءبىز "بولاشاق" باعدارلاماسىن جەتىلدىرۋدى جالعاستىرامىز", — دەپ جازدى مينيستر.
"ادىرنا" ۇلتتىق پورتالى.
