شىمكەنتتىك 11 جاستاعى ساعىن ءومىربايۇلى «گولوس.دەتي» شوۋىنىڭ توعىزىنشى ماۋسىمىنىڭ سۋپەرفينالىنا ءوتىپ، ءۇشىنشى ورىن الدى، - دەپ حابارلايدى "ادىرنا" پورتالى.
فينالدا ول «وچي چەرنىە» ءانىن ورىنداپ، كوپ داۋىس جيناپ، جوبانىڭ ءبىرىنشى سۋپەرفينالشىسى اتاندى.
جوبانىڭ سۋپەرفينالىندا ول «ەدينستۆەننايا مويا" ءانىن ورىندادى.
«گولوس.دەتي» جەڭىمپازى ەگور كريد كومانداسىنان سەگىز جاسار ادەليا زاگرەبينا اتاندى. كورەرمەندەردىڭ 40 پايىزى ادەلياعا داۋىس بەردى.
بۇعان دەيىن ساعىننىڭ اناسى گاۋھار وردابەكوۆا جۋرناليستەرگە بەرگەن سۇحباتىندا فينالعا بارۋ وڭاي بولماعانىن ايتقان بولاتىن. تىڭداۋ ءۇشىن ماسكەۋگە بارۋ ءۇشىن ولار نەسيەگە ۇشاق بيلەتتەرىن ساتىپ الۋعا ءماجبۇر بولدى. ولارعا جەرگىلىكتى مادەنيەت ءبولىمى ازىن-اۋلاق قولداۋ كورسەتكەنىمەن، بۇل قارجى جەتپەي قالدى. جاتاتىن ورىنعا، تاماققا، ساحنا كيىمىنە قاراجات قاجەت بولدى. سوعان قاراماستان، ساعىن فينالعا وتكەندە ءۇمىت پەن جۇمسالعان قاراجات اقتالدى.
اتا-انا ساعىننىڭ ونەرىن ءتورت جاسىنان-اق ۇيدە ءان شىرقاعان كەزدە بايقاعان. بالانىڭ مۋزىكانى قالاي ەستيتىنىن جانە نوتالاردى ءدال سوعاتىنىن ەستىگەن اناسى ۇلىن ۆوكالعا جىبەرۋگە شەشىم قابىلدادى. التى جاسىندا ونىڭ العاشقى بايقاۋى – «بالا داۋىسى» بولدى. 11 جاسىندا بالا قازاقستانداعى بارلىق ءىرى جارىستارعا قاتىسىپ، كوپتەگەن باس جۇلدەلەردى جەڭىپ الدى. "گولوس. دەتي" - ساعىن ءۇشىن تۇڭعىش حالىقارالىق جوبا.
ەسكە سالايىق، "گولوس. دەتي" مۋزىكالىق شوۋىنىڭ 6-ماۋسىمىندا قازاقستاندىق ەرجان ماكسيم السۋ ميكەللا ابراموۆادان جەڭىلىپ، ەكىنشى ورىن العان بولاتىن. ارتىنشا جانجال شىعىپ، جينالعاندار بۇل شەشىممەن كەلىسپەي، داۋىس بەرۋدى قايتا قاراۋدى تالاپ ەتتى. ءبىرىنشى ارنا باسشىلىعى فينالدى قايتالاۋدى ۇيعاردى، وندا جوبانىڭ بارلىق فيناليستەرى جەڭىمپاز دەپ تانىلدى. جەڭىمپاز ستاتۋەتكاسىن ءبىرىنشى بولىپ ەرجان ماكسيم الدى. «ەرجان، ەندى ءبىرىنشى ارنادا ەشتەڭە ساتىلمايتىنىن بىلەسىڭ»، - دەدى كونستانتين ەرنست قازاقستاندىقتارعا قاراتا ايتىپ.
