اقش پرەزيدەنتى دجو بايدەننىڭ اكىمشىلىگى رەسەي پرەزيدەنتى ۆلاديمير ءپۋتيندى جوعارى بىلىكتى رەسەيلىك مامانداردان ايىرۋدى كوزدەپ وتىر جانە وسى ماقساتتا امەريكا قۇراما شتاتتارىنا جۇمىس ۆيزالارىن بەرۋ ەرەجەلەرىن السىرەتۋدى جوسپارلاپ وتىر، دەپ حابارلايدى "ادىرنا" سايتى Bloomberg-كە سىلتەپ.
اگەنتتىكتىڭ حابارلاۋىنشا، اق ءۇي كونگرەسسكە جىبەرگەن سوڭعى قوسىمشا سۇراۋىنا اقش-تىڭ جۇمىس ۆيزاسىن الۋعا ءوتىنىش بىلدىرگەن رەسەيلىك جۇمىسشىلاردىڭ بەلسەندى جۇمىس بەرۋشىسى بولۋى كەرەك دەگەن ەرەجەنى الىپ تاستاۋ تۋرالى ۇسىنىستى ەنگىزگەن.
بۇل اقش-تا نەمەسە شەتەلدە عىلىم، تەحنولوگيا، ينجەنەريا نەمەسە ماتەماتيكا سالاسىندا ماگيستر نەمەسە دوكتورلىق دارەجەسىن العان رەسەي ازاماتتارىنا قاتىستى بولادى.
رەسەيلىك مامانداردىڭ براكونەرلىگى
اتاپ ايتقاندا، بايدەن اكىمشىلىگى جارتىلاي وتكىزگىشتەر، عارىشتىق تەحنولوگيالار، كيبەرقاۋىپسىزدىك، وزىق ءوندىرىس، وزىق ەسەپتەۋلەر، يادرولىق ينجەنەريا، جاساندى ينتەللەكت، زىمىران قوزعالتقىشى تەحنولوگياسى جانە باسقا دا مامانداندىرىلعان عىلىمي سالالاردا تاجىريبەسى بار رەسەيلىكتەردىڭ اقش-قا كوشۋىن جەڭىلدەتۋدى كوزدەپ وتىر.
اقش ۇلتتىق قاۋىپسىزدىك كەڭەسىنىڭ وكىلى «بۇل كۇش-جىگەردىڭ ماقساتى قىسقا مەرزىمدە پرەزيدەنت ءپۋتيننىڭ جوعارى تەحنولوگيالىق رەسۋرستارىن السىرەتۋ جانە ۇزاق مەرزىمدى پەرسپەكتيۆادا رەسەيدىڭ يننوۆاتسيالىق بازاسىن بۇزۋ، سونداي-اق اقش ەكونوميكاسى مەن ۇلتتىق قاۋىپسىزدىگىنە پايدا اكەلۋ» دەپ پايىمدادى.
جوسپار بويىنشا بۇل باعدارلاما ءتورت جىل بويى جۇمىس ىستەيدى.
رەسەيلىك ماماندار ەلدەن كەتىپ جاتىر
رەسەي ماماندارى 24 اقپاندا رەسەيدىڭ ۋكرايناعا باسىپ كىرۋىنەن كەيىن ەلدەن كەتە باستادى. چيكاگو ۋنيۆەرسيتەتىنىڭ ەكونوميسى كونستانتين سونين 7 ناۋرىزدا رەسەيدەن سوڭعى 10 كۇندە 200 مىڭنان استام ادام كەتكەنىن ايتتى. ول مۇنداي «قايعىلى ناتيجەنى» ەل ءبىر عاسىر بويى بىلمەگەنىن اتاپ ءوتتى.
رەسەيلىك ەلەكتروندى بايلانىس قاۋىمداستىعىنىڭ باعالاۋى بويىنشا، ءساۋىر ايىندا 70 مىڭنان 100 مىڭعا دەيىنگى عالىمدار رەسەيدەن كەتۋگە ارەكەتتەنۋى مۇمكىن. اق ءۇي ۋكرايناداعى سوعىسقا بايلانىستى باتىستىڭ رەسەيگە سالعان سانكتسيالارى اياسىندا قارجىلىق مۇمكىندىكتەردىڭ شەكتەۋلى بولۋىنا بايلانىستى جوعارى بىلىكتى مامانداردىڭ ەداۋىر بولىگى رەسەيدەن قاشىپ جاتقانىن اتاپ ءوتتى.
"ادىرنا" ۇلتتىق پورتالى
