وزىندىك ارباسى بار اۋىر موتوتسيكلدەر شىعاراتىن «ۋرال موتوتسيكلدەرى» ءوندىرىسىن رەسەيدەن قازاقستانعا كوشىرۋدە. بۇل تۋرالى كومپانيانىڭ باس ديرەكتورى يليا حايتتىڭ YouTube-تەگى رەسمي ارناسىندا جاريالاعان بەينەجازباسىندا ايتىلدى دەپ حابارلايدى "ادىرنا" سايتى.
بۇل قادام سانكتسياعا ۇشىرايتىن بىرقاتار قۇرامداس بولىكتەردىڭ تاپشىلىعىنا، سونداي-اق رەسەيدەن جابدىقتى اكەلۋگە تىيىم سالۋعا بايلانىستى. ۋرال موتوتسيكلدەرىنىڭ باسىم كوپشىلىگى باتىس ەلدەرىنە، سونىڭ ىشىندە اقش-قا بارادى.
قازاقستاننىڭ پەتروپاۆل قالاسىندا بۇرىن بۇل كولىكتەر شىعارىلعان يربيتتەن (سۆەردلوۆ وبلىسى) 600 شاقىرىم جەردە ورنالاسقان «ۋرال موتوتسيكلدەرىن» جاڭا قۇراستىرۋ الاڭى ۇيىمداستىرىلدى. سونىمەن قاتار، يربيت موتوتسيكل زاۋىتىنىڭ (IMZ) وزىندە جۇمىس جالعاسادى: وندا موتوتسيكلدەرگە ارنالعان جاقتاۋلار مەن كورپۋس ەلەمەنتتەرى شىعارىلادى.
حايتتىڭ ايتۋىنشا، كومپانيا بۇرىنعى كاسىپورىنداعى قىزمەتكەرلەردىڭ ءبىر بولىگىن قىسقارتۋعا جانە پەتروپاۆلدا جاڭا قىزمەتكەرلەردى جۇمىسقا الۋعا ءماجبۇر بولادى. بۇل رەتتە نەگىزگى باسقارۋ كومانداسى رەسەيدەن قازاقستانعا كوشەتىن بولادى.
جاڭا الاڭ رەتىندە كورشى مەملەكەتتىڭ تاڭداۋى موتوتسيكل ءوندىرىسىن تەزىرەك جولعا قويۋ قاجەتتىلىگىمەن، سونىمەن قاتار قالا تۇرعىندارىنىڭ ورىستىلدىلىگىمەن جانە لوگيستيكانى جىلدام ۇيىمداستىرۋ مۇمكىندىگىمەن بايلانىستى. حايت بيىلعى جىلى ساتۋ كولەمى ايتارلىقتاي تومەندەيدى دەپ بولجاپ وتىر جانە ول مۇنى تەك ۋكراينا توڭىرەگىندەگى جاعدايمەن عانا ەمەس، باسقا دا كوپتەگەن فاكتورلارمەن بايلانىستىرادى.
«Ural Motorcycles» — جۇك سالعىشى بار اۋىر جول تالعامايتىن موتوتسيكلدەردى سەريالىق شىعارۋمەن اينالىساتىن الەمدەگى جالعىز كومپانيا. ولار 41 ا.ك. بولاتىن 749 سم كۋب ەكى ءتسيليندرلى قوزعالتقىشپەن جابدىقتالعان. قوزعالتقىش بەس جىلدامدىقتى بەرىلىس قورابىمەن جۇمىس ىستەيدى ء(تورت الدىڭعى جانە ءبىر ارتقى). وسىلايشا، Ural Motorcycles كلاسسيكالىق كەڭەستىك ۋرال برەندىنىڭ تىكەلەي مۇراگەرى بولىپ تابىلادى. 2000 جىلى يربيتتەگى بانكروتقا ۇشىراعان كاسىپورىندى ينۆەستورلار توبى ساتىپ الدى، ونىڭ ىشىندە يليا حايت بار.
ۋرال موتوتسيكلدەرىنىڭ نەگىزگى نارىعى امەريكا قۇراما شتاتتارى - كومپانيانىڭ ءار شتاتتا دەرلىك بىرنەشە ديلەرى بار. مىسالى، 2022 جىلعى جاڭا Gear Up مودەلىنىڭ باعاسى 18,9 مىڭ دوللاردان باستالادى (اعىمداعى باعام بويىنشا شامامەن 1,4 ميلليون رۋبل).
"ادىرنا" ۇلتتىق پورتالى
