“مىناۋ مازاق قىلعانى عوي”: شەنەۋنىكتەر كوپ بالالى انالارعا اشىپ كەتكەن ءسۇت تاراتقان

4282
Adyrna.kz Telegram
فوتو: turkystan.kz
فوتو: turkystan.kz

اتىراۋدا كوپبالالى انالارعا شەنەۋنىكتەر اشىپ كەتكەن ءسۇت، ىشۋگە جارامايتىن شاي بەرگەن، دەپ حابارلايدى “ادىرنا” ۇلتتىق پورتالى turkystan.kz سايتىنا سىلتەمە جاساپ.

انالاردىڭ ايتۋىنشا، شەنەۋنىكتەر تۇرمىسى تومەن وتباسىلارعا كومەك رەتىندە ازىق-تۇلىك تاراتقان. ال الگى تاماق ونىمدەرىنىڭ اراسىنان مەرزىمى ءوتىپ كەتكەن ءسۇت پەن وتە ارزان شاي شىققان. شەنەۋنىكتەردىڭ بۇل ىسىنە اشۋلانعان كوپبالالى انالار شايدى ىشپەي، قالا اكىمى مەيىرىم قالاۋيگە سىيلاۋدى ءجون ساناپتى.

«انالارعا كومەك» قوعامدىق قورىنىڭ ءتورايىمى ساندۋعاش كوكەنوۆا وبلىستىق اكىمدىكتىڭ اتىنان كەلگەن شايدى كورسەتىپ، ءۋاجىن جەتكىزدى. ونىڭ ايتۋىنشا، اكىمدىك تاراتقان شايدى تۇرمەدەگىلەردىڭ ءوزى ىشپەيتىن كورىنەدى.

«ۇيىڭىزگە اپارىپ، قايناتىپ كورىڭىز. وسىنداي ءشايدى ىشەر مە ەدىڭىز؟ بۇل ءشايدى تۇرمەدە وتىرعاندار دا المايدى»، – دەيدى ول.

«مىناۋ مازاق قىلعانى عوي. ءسۇت اشىپ كەتكەن. نە ماسقارا؟! ۇيات قوي. ءبىر نان بەرسە دە ادال نان قىپ بەرسىنشى. قاتىپ قالعان، كوگەرگەن نان بەرمەسىن!» – دەيدى اشىنعان انالار.

ال اكىم بولسا، كومەككە مۇقتاج وتباسىلارعا بەرىلگەن تاۋارلارعا قاتىستى ماسەلەنى انىقتاپ، شارا قولداناتىنىن ايتتى.

ادىرنا” ۇلتتىق پورتالى

پىكىرلەر