بۇگىن «AMANAT» پارتياسىنىڭ قوعامدىق ساياسات ينستيتۋتى جانىنان «TALQYLAU» جاڭا ديالوگ الاڭى ءوز جۇمىسىن باستادى. پارلامەنت دەپۋتاتتارىنىڭ، ساراپشىلار مەن قوعام بەلسەندىلەرىنىڭ قاتىسۋىمەن وتكەن العاشقى تالقىلاۋ مەملەكەت باسشىسىنىڭ جولداۋىنا جانە ارالاس سايلاۋ جۇيەسىنە كوشۋگە ارنالدى. تالقىلاۋ الەۋمەتتىك جەلىلەردە تىكەلەي ەفيردە تاراتۋ ارقىلى ينتەراكتيۆتى فورماتتا ءوتتى.
«AMANAT» پارتياسى اشىق، كاسىبي جانە تەڭ جاعدايدا – جاريا ديالوگتىڭ جاڭا ستاندارتىن قالىپتاستىرادى. وتىرىستىڭ نەگىزگى ۋاقىتى ساياسي جۇيەنى ترانسفورماتسيالاۋ جانە ارالاس سايلاۋ جۇيەسىنە كوشۋ تۋرالى پىكىرتالاستارعا ارنالدى. بۇل رەتتە، سپيكەرلەرگە سۇراقتاردى زالداعى ساراپشىلار مەن قاتىسۋشىلار عانا ەمەس، سونىمەن قاتار ونلاين-كورەرمەندەردىڭ دە قويۋىنا مۇمكىندىگى بولدى. جالپى، 700-دەن استام پىكىر مەن سۇراقتار كەلىپ ءتۇستى.
«TALQYLAU»-دىڭ العاشقى وتىرىسىن اشقان «AMANAT» پارتياسىنىڭ اتقارۋشى حاتشىسى اسحات ورالوۆ پرەزيدەنت جاريالاعان رەفورمالار قازاقستاننىڭ مەملەكەتتىك قۇرىلىسى تاريحىنىڭ جاڭا كەزەڭىنە باستايتىنىن اتاپ ءوتتى.
«سايلاۋ تۋرالى زاڭناماعا وزگەرىستەر ەنگىزىلەدى. بۇل ەلدەگى دەموكراتيالىق وزگەرىستەردىڭ كاتاليزاتورى مەن نەگىزىنە اينالاتىنى ءسوزسىز. ساياسي پارتيالاردى تىركەۋ رەسىمدەرىن جەڭىلدەتۋ جاڭا ساياسي قوزعالىستاردىڭ قۇرىلۋىنا سەرپىن بەرەدى جانە جۇمىس ىستەپ تۇرعان ساياسي بىرلەستىكتەردىڭ ءوز قىزمەتىن جانداندىرۋىنا الىپ كەلەدى. بۇل باعىتتا «AMANAT» پارتياسى بەلسەندى جۇمىس ىستەۋدە. سەزدەن بەرى ءبىر ايعا دا جەتپەيتىن ۋاقىت ءوتتى. سوعان قاراماستان ونىڭ بارىسىندا ايتىلعان مىندەتتەر مەن باستامالار بۇگىندە ىسكە اسىرىلىپ جاتىر جانە «TALQYLAU» - سول باستامالاردىڭ ءبىرى», - دەپ اتاپ ءوتتى پارتيانىڭ اتقارۋشى حاتشىسى.
ءوز كەزەگىندە، «AMANAT» پارتياسى دەپۋتاتتىق فراكتسياسىنىڭ مۇشەسى ساياسات نۇربەك تالقىلاۋ العاش رەت تىكەلەي ەفيردە ءوتىپ جاتقانىن العا تارتىپ، «ءبىز بۇگىن قۇرىلىمدانباعان، تسەنزۋرادان وتپەگەن اشىق ديالوگ ءداستۇرىن باستايمىز دەپ ۇمىتتەنەمىز. بۇل پرەزيدەنت جولداۋى اياسىندا وتە ماڭىزدى، ويتكەنى «جاڭا قازاقستان» جۇمىسىن جاڭا قاعيداتتار مەن جاڭا جۇمىس فورماتتارىنان باستاۋ كەرەك», - دەدى.
«قازاقستاننىڭ ازاماتتىق اليانسى» زتب پرەزيدەنتى بانۋ نۇرعازيەۆا مىقتى قوعامسىز مىقتى مەملەكەت قۇرۋ مۇمكىن ەمەس دەگەن پىكىر ءبىلدىردى.
«ءبىز جاڭا رەفورمالارعا دايىنبىز. جۇرتشىلىق كوپ نارسە وزگەرەدى دەگەن ۇمىتپەن جولداۋدى ىقىلاسپەن قابىلدادى. ازاماتتىق قوعام وكىلدەرىمەن بىرلەسىپ زاڭنامالىق وزگەرىستەرگە قاتىستى كوپتەگەن جۇمىس اتقارىلادى دەپ كۇتەمىز», - دەدى ول.
پارلامەنت ءماجىلىسىنىڭ دەپۋتاتى بەرىك ابدىعاليۇلىنىڭ ايتۋىنشا، قازىر ەلىمىزدى جاڭا دەڭگەيگە كوتەرۋگە ۇلكەن مۇمكىنشىلىك بار. ول ءۇشىن جاڭا قازاقستاندا وزگەرىستى اركىم وزىنەن باستاۋى كەرەك.
«30 جىلدا جەتكەن جەتىستىكتەرىمىز بار. بىراق كەمشىلىكتەرىمىز دە از ەمەس. جاڭا قازاقستاندا پارتيادان باستاپ، ءاربىر ازاماتقا دەيىن، اۋىل اكىمىنەن پرەزيدەنتتىڭ جۇمىسىنا دەيىنگى جىبەرىلگەن كەمشىلىكتەردى انىقتاپ، ءتىپتى، سونىڭ ءتىزىمىن دە جاساساق. بيۋدجەتتى قۇرۋدا بىزدە كوپتەگەن گيگانتومانيا بولدى. قانشاما ميللياردتاعان قاراجات باسقا جاققا جۇمسالىپ، ال مىنا جاقتا حالىق ءۇيسىز-كۇيسىز ءجۇردى. ونىڭ بارلىعى كەمشىلىك پە؟ ارينە، كەمشىلىك. سوندىقتان پرەزيدەنتتىڭ ايتقانى، ءبىرىنشى كەزەكتە باسىمدىق وزگەرۋى كەرەك. ول ءۇشىن حالىقتىڭ جاعدايىنا قاراۋ قاجەت. بارلىعىنىڭ ولشەم – ادام. مىنە، قازىرگى بىزدەگى ناعىز قاعيدا وسى. بىرتىندەپ سوعان كەلە جاتىرىمىز»,- دەدى دەپۋتات.
«حالىق ۇنىنە قۇلاق اساتىن مەملەكەت» تۋرالى ايتقاندا، ءبىز ارقاشان «قۇلاق اساتىن مەملەكەت» جاعدايىندا «ايتاتىن» قوعام قاجەت ەكەنىن ءتۇسىنۋىمىز كەرەك. ەگەر اشىق «ايتاتىن» قوعام بولماسا، وندا ولار كىمنىڭ ۇنىنە قۇلاق اسۋى كەرەك؟ ەندى ءبىز پروتسەستى جىلدامداتۋ كەرەك. ويتكەنى جولداۋدا يدەيالار عانا ايتىلدى، ال ولاردى قالاي جۇزەگە اسىراتىنىمىزدى ءبىز بىرگە ويلانۋىمىز كەرەك. «AMANAT» پارتياسى ءوزىنىڭ العاشقى وزگەرىستەرىن اشىق الاڭنان باستاعانى جانە ءبىزدى شاقىرعانى قۇپتارلىق», - دەدى قوعام قايراتكەرى، «سەرپىن» ۇلتتىق ءبىلىم جانە يننوۆاتسيالار پالاتاسىنىڭ پرەزيدەنتى مۇرات ابەنوۆ.
سونداي-اق، قر پرەزيدەنتى جانىنداعى قسزي ديرەكتورى ەركىن تۇقىموۆ، ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى مارات ءباشىموۆ، قازاقستاندىق قوعامدىق دامۋ ينستيتۋتىنىڭ باسقارما توراعاسى قازبەك مايگەلدينوۆ، قر بعم عىلىم كوميتەتىنىڭ مەملەكەت تاريحى ينستيتۋتى ديرەكتورىنىڭ ورىنباسارى بۇركىتباي اياعان، پارلامەنت ءماجىلىسىنىڭ دەپۋتاتى تىلەكتەس ادامبەكوۆ جانە باسقالار ءوز پىكىرلەرىمەن ءبولىستى.
كەلەسى «TALQYLAU» وتىرىسى پودكاست جازباسى، دەباتتار، پىكىرتالاستار سياقتى ءتۇرلى فورماتتا وتەدى. ءارى قاراي تاقىرىپتار قوعامدىق ساياسات ينستيتۋتىنىڭ تەلەگرام-ارناسىندا داۋىس بەرۋ قورىتىندىسى بويىنشا انىقتالاتىن بولادى.
ەستەرىڭىزگە سالا كەتەيىك، «TALQYLAU» پىكىرتالاس الاڭىن قۇرۋ باستاماسى 1 ناۋرىزدا وتكەن كەزەكتەن تىس سەزدە پارتيانى ترانسفورماتسيالاۋ باعدارلاماسىنىڭ ءبىر تارماعى رەتىندە جاريالانعان ەدى. الاڭدا ازاماتتاردى تولعاندىراتىن وزەكتى ماسەلەلەردى شەشەتىن ۇسىنىستار ازىرلەۋ ءۇشىن ساراپشىلار، دەپۋتاتتار، مەملەكەتتىك ورگاندار مەن ۇەۇ وكىلدەرى تۇراقتى تۇردە كەزدەسەدى. سونىمەن قاتار، پىكىرتالاس «ايقىن» جانە «ليتەر» گازەتتەرىنىڭ ارنايى ايدارلارىندا جاريالاناتىن بولادى.
