Kaspi.kz باسشىسى جانە نەگىزىن قالاۋشى ارام پيعىلدىلار تۋرالى پىكىر ءبىلدىرىپ، سۇيىكتى كليەنتتەرىن قاۋەسەتكە سەنبەۋگە شاقىردى، دەپ جازادى "ادىرنا" ۇلتتىق پورتالى.
Kaspi.kz باسشىسى ءارى نەگىزىن قالاۋشى ميحايل لومتادزە سۇيىكتى كليەنتتەرىنە ۇندەۋ جولدادى.
«ءبىز ەشقاشان سۇيىكتى كليەنتتەرىمىزدى قيىن جاعدايعا قالدىرعان ەمەسپىز جانە قالدىرمايمىز. بىزگە سەنىم ارتقاندارىڭىز ءۇشىن ارقايسىڭىزعا راحمەت!»، - دەدى ول.
ميحايل سونداي-اق كورە الماۋشىلار مەن ارام پيعىلدىلاردىڭ Kaspi تۋرالى تاراتىپ جاتقان كەزەكتى قاۋەسەتىن «اقىماقتىق» دەپ اتادى.
ۆيدەوۇندەۋ ميحايل لومتادزەنىڭ Youtube-تەگى رەسمي كانالىندا جاريالانعان. تومەندە ۇندەۋدىڭ تولىق ءماتىنىن ۇسىنامىز.
«ءبىزدىڭ سۇيىكتى كليەنتتەرىمىز، سوڭعى بىرنەشە كۇننەن بەرى Kaspi تۋرالى جالعان اقپارات تاراپ جاتىر. بىزگە بۇل تۋرالى شاعىمدار كەلىپ تۇسە باستادى. مەن بىردەن بۇل كەزەكتى ميعا سىيمايتىن قاۋەسەتتەر تۋرالى جەكە پىكىر بىلدىرگەندى ءجون سانادىم. ءبىرىنشى، Kaspi-ءدىڭ بانكروتتىعى تۋرالى حابارلامالار. بۇل ناعىز دالباسا. مەن Kaspi كومپانياسىن 2007 جىلدان باستاپ، 15 جىلعا جۋىق باسقارىپ كەلەمىن. ءبىزدىڭ جەتىستىكتەرىمىز بەن جۇمىسىمىز ءۇشىن جەكە جاۋاپتىمىن. ءبىز ەلىمىز ءۇشىن كوپ نارسە جاسادىق، كليەنتتەرىمىز ءبىزدى جاقسى كورەدى، مۇندايدا كوپتەگەن ارام پيعىلدىلار مەن جامان ادامدار قىزعانىشپەن قاراپ، اقشا تولەپ، وتىرىك قاۋەسەت تاراتىپ، ارانداتۋشىلىق ۇيىمداستىرىپ، ءبارىن بۇلدىرۋگە تىرىساتىنى انىق. ءبىز ەشقاشان سۇيىكتى كليەنتتەرىمىزدى قيىن جاعدايعا قالدىرعان ەمەسپىز جانە قالدىرمايمىز. بىزگە سەنىم ارتقاندارىڭىز ءۇشىن ارقايسىڭىزعا راحمەت! ءبىز ارقاشان ەلىمىزدىڭ، قازاقستاندىقتاردىڭ جانە ءاربىر سۇيىكتى كليەنتىمىزدىڭ يگىلىگى ءۇشىن جۇمىس ىستەيمىز.
ەكىنشىدەن، قازاقستانداعى قولما-قول دوللار تاپشىلىعى تۋرالى. بىردەن ايتايىن، بۇل رەسەيگە قارسى سانكتسيالارعا تىكەلەي بايلانىستى ۋاقىتشا قۇبىلىس، سونىڭ سالدارىنان ادەتتەگى باعىتتار بويىنشا قولما-قول اقشانى جەتكىزۋ قيىنعا سوعۋدا. مىسالى، ۋكراينا مەن رەسەيدى اينالىپ ءوتۋ سالدارىنان تۇراقتى رەيستەردىڭ ۋاقىتى ۇزارىپ كەتكەنىن نەمەسە مۇلدە توقتاپ جاتقانىن ءبارىمىز كورىپ وتىرمىز. بۇل قولما-قول اقشانى جەتكىزۋگە بويىنشا دا وسىنداي ماسەلە بار. ۇلتتىق بانك قازىر اقش-تان تىكەلەي جەتكىزۋدى ۇيىمداستىرۋمەن اينالىسىپ جاتىر جانە جاقىن ارادا قولما-قول اقشا اكەلۋگە ۋادە بەردى. بۇل ۋاقىتشا تاپشىلىق تەك قولما-قول ۆاليۋتاعا قاتىستى. كورىپ وتىرعانىڭىزداي، دوللارمەن قولما-قول اقشاسىز وپەراتسيالاردى ەركىن جاساۋعا بولادى. بۇل جاعدايدىڭ تەڭگەگە مۇلدەم قاتىسى جوق.
ءۇشىنشى، قايرات ساتىبالدىنىڭ كەشەگى تۇتقىندالۋىنا قاتىستى. بىزگە كليەنتتەر تاراپىنان بۇل تۋرالى سۇراقتار بولعان جوق. بىراق ءبىزدىڭ جاۋلارىمىز وسى فاكتىنى پايدالانىپ، ءبىز تۋرالى تاعى دا جاعىمسىز پىكىر ايتۋعا تىرىساتىنىنا سەنىمدىمىن. سوندىقتان مەن بۇل تۋرالى الدىن الا پىكىر بىلدىرگىم كەلەدى. قايرات ساتىبالدىنىڭ Kaspi-مەن 4 جىلدان بەرۋ مۇلدەم قارىم-قاتىناسى جوق. ول 2015-2018 جىلدار ارالىعىندا قىسقا ۋاقىت ارالىعىندا Kaspi اكتسيونەرلەرىنىڭ ءبىرى بولدى.
Kaspi-ءدىڭ جەتىستىگى ەڭ الدىمەن، ءبىزدىڭ كوماندانىڭ ەڭبەگى. ءبىزدىڭ كوپتەگەن كومپانيالاردان ايىرماشىلىعىمىز بىزدە مەملەكەتتىڭ ارزان اقشاسى جوق، مەملەكەتتىك كومپانيالاردىڭ قىزمەتكەرلەرىن جالاقى الۋعا تارتقان جوقپىز، بىزدە مەملەكەتتىك كومپانيالاردىڭ دەپوزيتتەرى جوق جانە مەملەكەتتەن اقشانى مۇلدە المايمىز. مەملەكەت ءۇشىن ىسكە قوسىپ جاتقان قىزمەتتەردىڭ بارلىعىن ءوز قاراجاتىمىز ەسەبىنەن تەگىن، ەل يگىلىگى ءۇشىن جاسايمىز. ەڭ جارقىن مىسال - سىزدەردىڭ كوپشىلىگىڭىز قولداناتىن Kaspi.kz قوسىمشاسىنداعى مەملەكەتتىك قىزمەتتەر سەرۆيسى.
ءسوز سوڭىندا، مەن ارام پيعىلدىلار مەن قاسكويلەرگە ايتقىم كەلەدى! اقىماقتىقپەن اينالىسۋدى دوعارىڭىزدار. ءوز ماقساتتارىڭىزعا جەتۋ ءۇشىن Kaspi تۋرالى جالعان قاۋەسەت تاراتىپ، ۋاقىت پەن اقشانى بوسقا ىسىراپ ەتۋدىڭ ورنىنا، مەملەكەت پەن قازاقستان حالقىنىڭ يگىلىگى ءۇشىن ەڭبەك ەتىڭىز. سول ءۇشىن ءسىزدى كوبىرەك قۇرمەتتەيتىنىنە سەنىمدىمىن!
بىزبەن بىرگە بولعان سۇيىكتى كليەنتتەرىمىزگە تاعى دا راحمەت. ءبىز سىزدەردى جاقسى كورەمىز، قۇرمەتتەيمىز جانە ءسىزدى ەشقاشان قيىن جاعدايعا قالدىرمايمىز. جانە قازاقستاندىقتار جاقسى ومىرگە لايىق دەپ ەسەپتەيمىز. بۇگىن ءبىزدىڭ بارلىعىمىزدا بولاشاق ۇرپاق ءۇشىن جاڭا قازاقستاندى قۇرۋ ماقساتىمەن بىرىگۋدىڭ تاماشا مۇمكىندىگى بار!
ۋاقىتتارىڭىزدى العانىم ءۇشىن كەشىرىم سۇرايمىن. مەن سۇيىكتى كليەنتتەرىمىز بەن ەلىمىزدىڭ يگىلىگى ءۇشىن ارى جۇمىس ىستەي بەرەمىن!»، - دەپ مالىمدەدى ول.
