28 قاڭتاردا ماڭعىستاۋ وبلىسىنىڭ اكىمى نۇرلان نوعاەۆ جاڭاوزەن قالاسىنىڭ ءبىر توپ بەلسەندى ازاماتىمەن كەزدەسىپ، تۇرعىنداردى تولعاندىرعان بىرقاتار الەۋمەتتىك ماسەلەلەردى تالقىلادى، دەپ حابارلايدى «ادىرنا» ءتىلشىسى وبلىس اكىمىنىڭ ءباسپاسوز قىزمەتىنە سىلتەمە جاساپ.
تۇرعىندار قالاداعى اۋىز سۋ، جۇمىسسىزدىق، ازىق-تۇلىك باعاسى جانە ت.ب. الەۋمەتتىك ماسەلەلەردى شەشۋدى سۇرادى.
جيىن بارىسىندا وبلىس اكىمى مەملەكەت باسشىسى قاسىم-جومارت توقاەۆتىڭ تاپسىرماسىمەن ۇكىمەت 2025 جىلعا دەيىنگى ماڭعىستاۋ وبلىسىنىڭ الەۋمەتتىك-ەكونوميكالىق دامۋىنىڭ كەشەندى جوسپارىن بەكىتكەنىن اتاپ ءوتتى.
- بەس جىلعا جوسپارلانعان جوبا اياسىندا وبلىسقا 2,1 ترلن تەڭگە تارتىلادى. كەشەندى جوسپار اياسىندا ينجەنەرلىك جەلىلەر، ينفراقۇرىلىم، اۋىز سۋ وندىرەتىن زاۋىتتار، زاماناۋي مەكتەپتەر مەن سپورت كەشەندەرىن سالۋعا باعىتتالعان بارلىعى 226 جوبا ىسكە اسادى. بۇل جۇمىستار جاڭاوزەن قالاسىن دا جۇزەگە اسىرىلاتىن بولادى،- دەدى نۇرلان نوعاەۆ.
وبلىس اكىمىنىڭ ايتۋىنشا جاڭاوزەن قالاسىنداعى ءبىلىم مەن دەنساۋلىق سالاسىندا دا تىڭ جوبالار ىسكە اسىرىلادى دەپ كۇتىلۋدە.
- نۇر-سۇلتان قالاسىنان ءبىلىم سالاسىندا جۇمىس ىستەپ جۇرگەن كاسىپكەرلەر توبى كەلىپ، جاڭاوزەن قالاسىنداعى 10 مەكتەپتى سەنىمگەرلىككە الامىز دەگەن ۇسىنىس جاسادى. ولار قاراجاتىن وزدەرى قۇيادى، ىشىندەگى وقۋ ادىستەمەلىك قۇرالدارىن جاڭادان جاساقتاپ، اعىمداعى جوندەۋ جۇمىستارىن جۇرگىزەدى. جۇمىس توبى سونداي-اق ەلىمىزدىڭ ۇزدىك وقىتۋشىلارىنىڭ تاجىريبەلەرىن الىپ كەلىپ، مەكتەپ باسشىلارى مەن مۇعالىمدەرىنىڭ بىلىكتىلىگىن ارتتىرماقشى. 10 جىل بويى اكادەميالىق جانە ادىستەمەلىك سۇيەمەلدەۋ جۇرگىزىپ، مەملەكەتتىك ستاندارت بويىنشا ءبىلىم مەن تاربيە الاتىنداي جاعداي جاسايمىز دەدى. ءبىزدىڭ ماقساتىمىز بالالارىمىزعا ساپالى ءبىلىم مەن تاربە بەرىپ، بولاشاقتارىنا سەنىم ۇيالاتىپ، مۇناي سالاسىنان باسقا دا جاڭا ماماندىقتاردى بويلارىنا ءسىڭىرۋ. مۇناي ەرتەلى-كەش تۇگەسىلەدى. ءبىز بالالارىمىزدىڭ وزگە سالالاردا باسەكەگە قابىلەتتى بولۋىن قامتاماسىز ەتۋىمىز قاجەت. سونداي-اق، «سامۇرىق قىزىنا»، «قازمۇنايگاز»، «وزەنمۇنايگاز» كومپانيالارىنىڭ قاراجاتىنا تەك مۇنايشىلارعا ەمەس، بارلىق تۇرعىندارعا ارنالعان ەڭ وزىق ۇلگىدەگى مەديتسينالىق وڭالتۋ ورتالىعى (50 ورىندىق) سالىنىپ جاتىر. وندا الەمنىڭ سوڭعى ۇلگىدەگى مەديتسينالىق قوندىرعىلارى ورناتىلاتىن بولادى. ورتالىق وسى جىلدىڭ ءبىرىنشى توقسانىندا پايدالانۋعا بەرىلەدى،- دەدى وبلىس اكىمى.
جيىن سوڭىندا ايماق باسشىسى ايتىلعان وزەكتى ماسەلەلەر نازارعا الىنىپ، ءوڭىردىڭ دامۋ جوسپارىنا سايكەس ءتيىستى شەشىمدەر قابىلداناتىنىن ايتتى.
«ادىرنا» ۇلتتىق پورتالى
