مەملەكەت باسشىسى قاسىم-جومارت توقاەۆتىڭ توراعالىعىمەن پرەزيدەنت اكىمشىلىگى، قاۋىپسىزدىك كەڭەسى، باس پروكۋراتۋرا، ۇلتتىق قاۋىپسىزدىك كوميتەتى، قورعانىس جانە ىشكى ىستەر مينيسترلىكتەرى باسشىلارىنىڭ كەڭەسى ءوتتى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
مەملەكەت باسشىسىنا ەلىمىزدەگى احۋالدى تۇراقتاندىرۋ ءۇشىن بەرىلگەن تاپسىرمالاردىڭ ورىندالۋ بارىسى تۋرالى باياندالدى. اسىرەسە قاۋىپسىزدىك پەن قۇقىقتىق ءتارتىپتى قايتا قالپىنا كەلتىرۋگە، ازاماتتاردىڭ زاڭدى قۇقىقتارىن قامتاماسىز ەتۋگە باسا ءمان بەرىلدى.
باياندامالاردى تىڭداعان مەملەكەت باسشىسى بولعان وقيعانىڭ بارلىق ءمان-جايىن انىقتاۋ جۇمىستارىن جالعاستىرۋ قاجەت ەكەنىن ايتتى.
قاسىم-جومارت توقاەۆ اقپارات سالاسىنداعى كۇشتىك قۇرىلىمدار مەن وكىلەتتى ورگاندار كۇش-جىگەرلەرىن ۇيلەستىرىپ، جۇرتشىلىق تاراپىنان تۇسەتىن ساۋالدارعا جەدەل جاۋاپ بەرۋگە ءتيىس ەكەنىنە توقتالدى.
مەملەكەت باسشىسى تۇرعىنداردىڭ قازاسىنا قاتىستى ماسەلە بويىنشا باس پروكۋراتۋراعا جانە ىشكى ىستەر مينيسترلىگىنە ءاربىر جاعدايدى مۇقيات تەرگەپ-تەكسەرۋ جونىندە تاپسىرما بەردى.
– جۇرتشىلىقتىڭ بولعان وقيعالار جونىندە دولبار مەن قاۋەسەتكە نەگىزدەلگەن پىكىر قالىپتاستىرۋىنا جول بەرۋگە بولمايدى. ازاماتتار بيلىكتىڭ اشىقتىق پەن زاڭدىلىقتى قامتاماسىز ەتىپ وتىرعانىن كورۋگە ءتيىس، – دەدى مەملەكەت باسشىسى.
پرەزيدەنت اكىمشىلىگىنىڭ باسشىلىعىنا اتالعان ماسەلەنى باقىلاۋعا الۋ تاپسىرىلدى.
«ادىرنا» ۇلتتىق پورتالى
