ريشات اسقاربەكۇلى: كولىك باعاسى 2022 جىلدىڭ سوڭىنا دەيىن ارزاندامايدى

4522
Adyrna.kz Telegram

ۋتيليزاتسيالىق الىم ازايادى، «وكم وپەراتورى» ءاليا نازارباەۆادان مەملەكەتكە ءوتتى، ەندى ماشينا ارزاندايدى دەگەن ەرتەگى. بۇل تۋرالى ەلدەگى ەڭ ءىرى اۆتوسالون وكىلدەرىنىڭ ءوزى ايتىپ وتىر. جۇرىلگەن اۆتوموبيلدەردىڭ ارزانداۋىنىڭ ءبىر جولى – اۆتوسالوندار بۇرىنعىداي جاڭا كولىكتەرگە تولىپ، تۇتىنۋشى قالاعان كومپلەكتاتسياسى مەن كولىك ءتۇسىن ەركىن تاڭداۋ مۇمكىندىگى بولۋى كەرەك.

دەفيتسيت بارىس جىلىنىڭ سوڭىنا دەيىن بولا بەرەدى. جالپى الەمدىك اۆتوموبيل نارىعىندا قالىپتاسقان بۇل جاعداي كەلەسى جىلدىڭ باسىنا دەيىن جالعاسۋى مۇمكىن. سەبەبى بىلتىر جاڭا كولىكتەرگە پرەدوپلاتا الىپ قويعاندار قازىر تۇتىنۋشىلارعا اقشالارىن قايتارا باستاعان. سوسىن ەلگە كەلەتىن جاڭا كولىكتىڭ دەنى رەسەيدە قۇراستىرىلادى. ولار نە دەيدى سول بولادى. ازيااۆتو ءولدى، سارىارقااۆتوپروم قالت-قۇلت ەتىپ ىستەپ تۇر.

كوپتەگەن اۆتوموبيل برەندتەرىنە جاڭا تاپسىرىستار الۋ 2021 جىلدىڭ سوڭىنا قاراي مۇلدەم توقتاتىلدى. بيىل ناۋرىز، ءساۋىر ايىندا كەلۋى ءتيىس جاڭا كولىكتەردەن دە كۇدەر ۇزگەن ءجون. كەلگەننىڭ وزىندە جۇپىنى كومپلەكتاتسيا مەن باعاسى الدەقايدا قىمبات بولادى. تيىسىنشە جۇرىلگەن، اسىرەسە زاۋىتتان شىققانىنا 5 جىلدان اسپاعان جاڭالاۋ كولىكتەردىڭ باعاسى دا تومەندەمەيدى. سالوندا كولىك جوق بولعان سوڭ، ولار جوعارى سۇرانىسقا يە بولىپ قالا بەرەدى. سۇرانىس بولعان جەردە قاراپايىم ساتۋشى دا مۇرنىن ءشۇيىرىپ، ويىنا كەلگەن باعانى ايتىپ جاتىر.

جاڭا جىلدان باستاپ، كولىكتەرگە باعا تاعى دا ءوستى. ءبىرىنشى قاڭتاردان كولىك قۇنىنىڭ ارتاتىنى تۋرالى سىبىس پەن بولجامدار بولعان. ادەتتە جەلتوقسان ايىندا بارلىق اۆتوسالوندار كولىكتى كوپ ساتادى، سەبەبى جاقىندارىنا سىيلىق جاساۋ، سوسىن مەملەكەتتىك بيۋدجەتتىڭ يگەرىلمەي قالعان قارجىسىنا قىزمەتتىك كولىكتەر ساتىپ الۋ بەلەڭ الاتىن كەزەڭ. بۇل جولى سالوندارداعى تاپشىلىق ءبارىنىڭ جوسپارىن وزگەرتتى. ال جەكەلەگەن ادامداردىڭ تاعى سول جۇرىلگەن كولىكتەردى ساتىپ الۋدان باسقا امالى قالمادى. كورشىسى كولىگىن الدەقايدا قىمباتقا ساتقانىن ەستىگەن امىربولات قالماق تا ەلدەن قالام با دەپ، كولىگىن «كولەساعا» اسپانداعى باعامەن حابارلاندىرۋ بەرىپ قويدى. ول وتە مە، وتپەي مە ءبارىبىر.

قازىر TRADE-IN جۇيەسىمەن جۇرىلگەن كولىكتەردى ساتىپ الىپ، قايتا ساتۋ سەگمەنتى جاقسى جۇمىس ىستەپ تۇر. اۆتوديلەرلەر دەفيتسيت كەسىرىنەن تۇرالاپ قالماس ءۇشىن وسى باعىتتى دامىتىپ جاتىر. شاھارداعى «مايكار»، «استەراۆتو» سياقتى ونداعان اۆتوماركەتتەردە قازىر كادىمگىدەي اجيوتاج. كولەساعا قىمباتقا قويىپ قويعان ماشيناسىنا ەكى اپتا بويى ەشكىم زۆونداماي قويعان سوڭ، ءبىزدىڭ ءامىربولات وسىنداي اۆتوسالونداردى جاعالاپ، كولىگىن باعالاتىپ ءجۇر. ولار دا اقىماق ەمەس وتىمدىلىگى جوعارى تويوتا، نيسسان، حيۋنداي سياقتى كولىكتەردى نارىقتىق باعامەن الادى. قالعاندارىن وتە تومەن باعالايدى. بەرسەڭ بەر، بەرمەسەڭ قايقاي، دەيدى.

بەساعاشتاعى استەراۆتونىڭ اۋلاسىندا قازىر 2,5 مىڭ جۇرىلگەن كولىك ساۋدادا تۇر. جاڭا جىل قارساڭىندا جۇرىلگەن كولىكتەردى كوپتەپ ساتىپ الۋعا تىرىسقان. 2022 جىلى دەفيتسيت بولاتىنىن، باعانىڭ تۇسپەيتىنىن بىلگەندىكتەن وسىنداي قادامعا بارعانى تۇسىنىكتى. «يۋريديچەسكي تازا، تەكسەرىلىپ الىنعان» دەگەن ەرتەگىلەرىن ايتادى دا، اسىقپاي ساتادى.

وتكەن جىلدىڭ قاراشا ايىندا 2020 جىلعى كومپلەكتاتسياسى جاقسى «حيۋنداي تۋكسوندى» 12,5 ملن-عا باعالايتىن وسى الىپساتارلار قاڭتاردىڭ 15-ءى كۇنى ءدال وسى كولىكتى 18,5 ملن تەڭگەگە باعالاپ ساتىلىمعا شىعارىپ قويىپتى. ال 2015 جىلعى «تويوتا كامري 55» جاڭا جىلدىڭ قارساڭىندا 10-11 ملن تەڭگە ەدى، ءدال بۇگىن 15 ملن-عا باعالانىپ تۇر. بۇل دا قۇيتىرقىلىق. باعا رەتتەلگەنشە، ەلدەگى ساياسي تۇراقسىزدىق قالپىنا تۇسكەنشە سۇرانىسقا يە اۆتوموبيلدەردى ۇستاي تۇرۋ. سوسىن باعا ءتۇستى دەگەن جەلەۋمەن، ءسال ارزانداتىپ ساتا باستايدى.

ەڭ ابزالى جىل سوڭىنا دەيىن استىڭىزداعى كولىكتى جاقسى كورىپ، باپتاپ ايداي تۇرۋ كەرەك. ايتپەسە ۋتيلالىم مولشەرلەمەسى ازايعانىن كۇتىپ، شەتەلدەن تاپسىرىسپەن جاعدايى جاقسى، جىلى جاڭالاۋ ب/ۋ كولىك الدىرتقان ءتيىمدى.

 

"ادىرنا" ۇلتتىق پورتالى

 

 

پىكىرلەر