Далай-Лама адамзатқа қауіп төнгендігін жариялады

2461

XIV Далай-Лама Жер тұрғындарына үндеу жасады, деп хабарлайды "Адырна" ұлттық порталы.

"2021 жылдың Жер күнінде мен бүкіл әлемдегі бауырларыма бізді алда тұрған қиындықтар мен мүмкіндіктерді қарастыруға шақырамын. Біздің планета - бұл керемет өмір сүруге арналған жер. Оның өмірі - біздің өміріміз, оның болашағы - біздің болашағымыз. Жеке ұйымдар мен жекелеген мемлекеттер жаһандық жылыну және озон қабатының жұқаруы сияқты әмбебап проблемалар алдында өздерін дәрменсіз сезінеді. Біз күш біріктірмесек, оларды шеше алмаймыз. Біздің Жер-анамыз бізге жалпыға ортақ жауапкершілік туралы сабақ береді", - деп жазылған буддизмнің рухани көшбасшысының сайтында.

Ол адамзаттың проблемаларының бірі - су тапшылығы мәселесін атап өтті.

"Бүгінгі күні әлемнің көптеген бөліктеріндегі адамдардың, әсіресе аналар мен балалардың әл-ауқатына бұрынғыдан да қатты су тапшылығы мен санитарлық-гигиеналық талаптардың жеткіліксіздігі қауіп төндіреді. Әлемдегі екі миллиардқа жуық адамның маңызды медициналық қызметтерге қол жетімсіздіктен зардап шегуі алаңдатады", деп қосты ол.

Далай Лама өзара тәуелділік - табиғаттың негізгі заңы деп түсіндірді.

"Өзара тәуелділікті түсінбеу қоршаған ортаға ғана емес, адамзат қоғамына да зиян тигізеді. Демек, біз, адамдар, бүкіл адамзаттың бірлігін жүзеге асыруға келісуіміз керек. Қоршаған ортаға қамқорлық біздің күнделікті өміріміздің ажырамас бөлігі болуы керек",  деп қорытты сөзін Нобель сыйлығының лауреаты.

"Адырна" ұлттық порталы

Пікірлер
Ұқсас жаңалықтар