Түркістанда Ұлттық құрылтай өтіп жатыр. Мемлекет басшысы құрылдайдың ел басына қатер төнген кезде шақырылатынын айтып, еліміздегі қайғылы оқиғаны еске алды, деп хабарлайды "Адырна" ұлттық порталы.
Тоқаев құрылтайдың тарихи толғақтарда, қиын-қыстау кезде шақырылатынын айтып, арқаны кеңге салатын кез емес екенін ескертті.
«Сөз басында бірден атап өтейін, меніңше, Ұлттық құрылтай бұл – арқаны кеңге салып отыратын жиын емес. Сән-салтанатпен өткізетін той да емес. Бабаларымыз маңызды шешім қабылдар кезде немесе елге қатер төнген сын сағатта құрылтай шақырған, - деді Қасым-Жомарт Тоқаев.
Сонымен қатар, президент Абай облысындағы алапат өртті айтып, қайғылы жағдайды еске алды.
- Бүгінгі құрылтайдың отырысы еліміздегі қайғылы оқиғадан кейін өтіп жатыр. Абай облысында алапат өрт шығып, азаматтарымыз қаза тапты. Тағы да қайталап айтқым келеді: біз мұндай оқиғадан сабақ алуымыз керек, нақты шешімдер қабылдауымыз қажет.
Ел басына түскен қиындықтар, ең алдымен, біздің береке-бірлігімізді сынға салады. Осындай күрделі сәттер, ең бастысы – шынайы жанашырлық және терең жауапкершілік таныту қажет екенін айқын көрсетеді. Мұны өздеріңіз өте жақсы түсініп отырсыздар», - деді президент.
"Адырна" ұлттық порталы
