3 qańtarda Mańǵystaý oblysynyń ákimi Nurlan Noǵaev suıytylǵan munaı gazynyń baǵasyn tómendetýdi talap etken Aqtaý qalasynyń avtokólik ıelerimen kezdesti, dep habarlaıdy Mańǵystaý oblysy ákiminiń baspasóz qyzmeti.
Nurlan Noǵaev jınalǵandarǵa Memleket Basshysy Qasym-Jomart Toqaevtyń tapsyrmasy boıynsha suıytylǵan munaı gaz baǵasyn tómendetýge qatysty Úkimet qabyldaǵan sharalardy túsindirdi.
Oblystyń AGQS ıeleri bıznestiń áleýmettik jaýapkershiligi aıasynda bastamashylyq tártippen gaz qunyn 120 teńgeden 85-90 teńgege deıin tómendetý týraly sheshim qabyldady.
Nurlan Noǵaev Básekelestikti qorǵaý jáne damytý agenttigi AGQS ıelerine qatysty baǵalyq sóz baılasý boıynsha tergeý bastaǵanyn aıtty.
Avtokólik ıelerimen kezdesý barysynda Nurlan Noǵaev jınalǵandardy qoǵamdyq tártipti saqtaýǵa, halyqtyń ómiri men densaýlyǵyna qaýip tónýine jol bermeýge shaqyrdy.
Oblys ákimi kez-kelgen máseleni tek syndarly dıalog arqyly sheshýge bolatynyn atap ótti.
Kezdesýge Úkimettiń tapsyrmasy boıynsha qurylǵan komıssııa quramyna kiretin energetıka mınıstrligi men básekelestikti qorǵaý jáne damytý agenttiginiń ókilderi de qatysty.
"Adyrna" ulttyq portaly
