Mańǵystaý oblysynyń ákimi Nurlan Noǵaev Jańaózen qalasynda gaz baǵasyn tómendetýdi talap etken kólik ıelerimen kezdesti, dep habarlaıdy "Adyrna" ulttyq portalynyń tilshisi oblys ákiminiń baspasóz qyzmetine silteme jasap.
Nurlan Noǵaev jınalǵandarǵa Memleket basshysy Qasym-Jomart Toqaevtyń tapsyrmasy boıynsha gazǵa baǵa belgileýge qatysty úkimet qabyldaǵan sharalardy túsindirdi.
Qazirgi ýaqytta Qazaqstan Respýblıkasynyń premer-mınıstri Asqar Mamınniń ókimimen Mańǵystaý oblysynyń áleýmettik-ekonomıkalyq jaǵdaıyn qaraý jónindegi Úkimettik komıssııa qurylǵanyn, olar gazdyń baǵasyn retteý boıynsha keshendi sharalardy júzege asyrýǵa nıetti ekenin aıtty.
Ákim óńirdegi janar-jaǵarmaı quıý beketteriniń ıeleri bıznestiń áleýmettik jaýapkershiligi aıasynda gazdyń lıtrin 120 teńgeden 85-90 teńgege deıin tómendetýge belsendi sheshim qabyldaǵanyn aıtty.
- Baǵa dálizderin qurý jáne janarmaı baǵasynyń alypsatarlyq ósýine jol bermeý arqyly baǵanyń uzaq merzimdi turaqtylyǵyn qamtamasyz etý boıynsha júıeli sharalar qabyldanady. Janarmaı quıý beketteriniń ıelerine qatysty básekelestikti qorǵaý jáne damytý agenttigi tekserýdi bastady, - dedi Nurlan Noǵaev.
Oblys ákimi jınalǵandardy máselelerdi zańdy jolmen, syndarly dıalog arqyly sheshýge shaqyrdy.
"Adyrna" ulttyq portaly
