Pavlodar oblysynda ákimdik 7 balanyń anasyn sotqa bermekshi. Atqaminerler kópbalaly ana ataýly áleýmettik kómekti zańsyz aldy dep aıyptap, 670 myń teńge járdemaqyny keri qaıtarýdy talap etýde, dep habarlaıdy «Adyrna» tilshisi «Astana» arnasyna silteme jasap.
Múgedek balasy men kúıeýin baǵyp otyrǵan aqsýlyq kelinshek qomaqty qarajatty qaıtarýǵa qaýqarsyz.
3 jyl buryn ár balasyna memleketten 21 myń teńge alǵanyn moıyndaıdy. Ákimdik múgedek balasyna alatyn qarajatty jasyrdyń dep jazǵyrǵan. Amaly taýsylǵan otbasy arnamyzdan arasha surady.
Saıragúl Moldabaıqyzy – 7 balanyń anasy. Osydan 3 jyl buryn balalaryna alǵan járdemaqy, endi bas aýrýyna aınalǵan. Ákimdik ony sotqa bermekshi. Óıtkeni, ataýly áleýmettik kómek alarda tabysyn jasyrǵan dep aıyptap otyr. Al kópbalaly ana bolsa, kirisin jasyrmaǵanyn aıtyp, bezek qaǵady.
Saıragúl MOLDABAIQYZY, KÓPBALALY ANA:
– Nege bizdi aıamaıdy? Múgedekterge nege qamqorlyq jasamaıdy. Meniń kinám ne sonda? Osylaı zar jylap otyrǵan adamdy bilmedi, kórmedi, ótirik aıtady deıdi. Men myna túrimmen qalaı ótirik aıtamyn? Myna múgedek qyz arqyly seniń otbasyńa tabys kirip otyr deıdi. Jatqan túri mynaý. Bir túgil, eki múgedek baǵyp otyrmyn.
Aıtýynsha, otbasynyń jalǵyz kirisi – ol múgedek balasy men kúıeýine beriletin bolmashy járdemaqy ǵana. Moıyndaryna qaryz qylyp qoıǵan 670 myń teńgeni tóleýge shamasy kelmeıtinin aıtady. Osydan 2 jyl buryn da bul máseleni kótergen bolatynbyz. Ol kezde ákimdik ókilderi qaryzdy demeýshiler kómegimen jaýyp beremiz dep te ýáde bergen edi. Alaıda, ýádelerinde turmaǵan.
Baltabaı QAPPASOV, AQSÝ QALASY ÁKIMINIŃ ORYNBASARY:
– Bul kisi jumys istedim dep aıtqan joq. Bala kútimimen júrdim dedi. Túsinip otyrmyz. Ońaı emes. Sondyqtan men de sizge aıtyp otyrmyn. Demeýshilik tarapynan kómek kórsetildi. Áli de kórsetemiz.
Al zańger Kamısha Esmuhamedqyzy ákimdiktiń áreketi zańsyz dep baǵalaıdy. Óıtkeni, shendiler ózderi jibergen qateliktiń saldarynan ortaıǵan qazyna qarjysyn toltyrýdy ǵana oılap otyrǵanyn aıtty.
Kamısha ESMUHAMEDQYZY, ZAŃGER:
– Óziniń qarajaty jetip tursa, memleketten qol jaımaıdy jáne suramaıdy. Zańsyz aldy dep tanylǵany ne sot sheshimi joq. Ne ony qandaı da bir qaǵaz júzinde tergeý amaldary zańsyz paıdaǵa kenelgenin dáleldengen joq. Sondyqtan kópbalaly anaǵa 3 jyldan keıin qoıyp otyrǵan talap aryz negizsiz.
Aqsý qalasy ákiminiń orynbasary, bul problemany ońtaıly sheshemiz ýáde berdi. Biraq ony qashan oryndaıtyndaryn ashyp aıta almaıdy.
«Adyrna» ulttyq portaly
