Ońtústik Qazaqstan oblysynda 6 mln teńgeni taýyp alǵan jigit ony ıesine qaıtarǵan. Ózi balalar úıinde ósken Samat Bekebaev osylaısha jalǵyzbasty anaǵa qaıyrym tanytqan. Bul týraly QazAqparat saıtyna aqshasyn joǵaltqan Áıgerim esimdi ájeı habarlasyp, alǵysyn jetkizdi.
«Men qujatym men aqshamdy joǵalttym. Ony Samat Bekebaı esimdi jigit ákep berdi. 6 mln teńgege úıimdi satyp edim. Keıin aqshamdy aýylǵa alyp bara jatqan jerimnen joǵalttym. Bul bala meniń qujatymdy taýyp alǵan, ishinde meniń ápkemniń nomeri bolatyn. Soǵan xabarlasyp, meni taýyp aldy. Aqshamdy qaıtardy. Ózi jaqynda balalar úıinen shyqqan eken», - dedi Áıgerim ájeı.
Belgili bolǵandaı, jas jigit sol kúni Shardara aýdanynan qaıtyp kele jatqan eken. Taksıge mingende Áıgerim esimdi áıel otyrǵan. Ekeýi jol boıynda áńgimelesip kelgen. Shymkentke jetkende ájeı túsip qalypty.
«Shymkentke kelgende apa zattaryn alyp, túsip ketti. Artynan men túsip, kóliktiń júk salǵyshynan zattarymdy aldym. Qarasam onda bir qara sómke qalyp qoıypty. Meniń zatymnyń janynda bir qara sómke tur eken. Taksı júrgizýshisinen surasam, ol meniki emes dedi. Sol kezde apanyń zaty ekenin anyq bildim. Óıtkeni ol kólikte tek úsheýmiz otyrǵan edik. Qara sómkeni alyp, úıge aparyp qoıdym. Ishin ashyp qarasam, dápter men oramalǵa oralǵan kóp aqsha tur eken. Óz kózime ózim senbedim. Sebebi, ómirimde ondaı aqsha ustaǵan emespin. Qaıta orap qoıdym da dápterdi aqtardym. Sosyn ishindegi nómirlerge habarlasyp, apanyń mekenjaıyn suradym. Araǵa 4-5 kún salyp, Shardara aýdanyna qaıta bardym. Apaǵa qara sómkesin tapsyryp qaıttym. Sońynan rıza bolyp maǵan rahmet retinde 56 myń teńge berip jiberipti», - dedi Samat Bekebaev.
Jas jigit kóp aqshany kórgende ár túrli oı kelgenin de jasyrmady. Biraq adamgershilikten attap kete almaǵanyn aıtady.
«Aqshasyn aparyp bergenim de jaqsy bolǵan eken. Sebebi zeınet jasyndaǵy ájeıdiń asyrap alǵan múgedek qyzy bar eken. Sony emdetemin dep úıin bankke kepilge qoıyp, qomaqty nesıe alypty. Alaıda ol qaryzyn tóleı almaǵan. Bolmaǵan soń, aýyldaǵy jalǵyz úıin satyp, jarty aqshasyna banktiń qaryzyn jaýypty. Qalǵan aqshasy sol qara sómkede bolǵan eken. Oǵan osy qaladan bir bólmeli páter alamyn dep josparlap júrgenin aıtty. Qalaı bolǵanda da jaqsylyq jasap, jaman bolmadym. Sol aqshany aparyp bergen kúnniń ertesine bir kisi habarlasyp, páter kezeginde turǵan maǵan úı beriletinin aıtty. Qýanyp kettim. Qazir sol bir bólmeli úıimdi alyp, osynda turyp jatyrmyn», - deıdi jas jigit.
Aınur Aqbaev
matritca.kz
