ASTANA. QazAqparat - Alash qaıratkerleriniń taǵdyryn arqaý etken «Tar zaman» telehıkaıasy 26 naýryzdan bastap «Qazaqstan» ulttyq arnasynda kórsetiletin boldy. Bul týraly «Qazaqstan» RTRK» AQ basqarma tóraǵasy Erlan Qarın aıtty, dep habarlaıdy «QazAqparat» HAA tilshisi.
«Eń basty úlken premeramyz - «Tar zaman» atty telehıkaıamyz. Ol 14 epızodtan turady. Búgingi kúni atalmysh telehıkaıanyń yqshamdalǵan nusqasy fılm retinde kınoteatrlardan kórsetilip jatyr.
Osyǵan baılanysty áriptesterim áleýmettik jelide «nelikten keńirek kórsetpedińizder?» degen suraqtar qoıyp jatyr. Biraq, teleserıal men fılm arasynda úlken aıyrmashylyq bar. Biz buny áý basta teleserıal retinde daıyndaǵan edik. Alaıda aýdıtorııanyń qyzyǵýshylyǵyn oıatý maqsatynda fılm retinde yqshamdap, birneshe kınoteatrlarmen kelise otyryp, telehıkaıa birqatar qalalarda kórsetilip jatyr», - dedi E.Qarın.
Onyń aıtýynsha, atalmysh telehıkaıa óte qyzyqty dramaly bolmaq. «Tar zaman» bizdiń efırge naýryzdyń 26-nan bastap kórsetiletin bolady. Onyń keıipkerleri - bir ǵasyr buryn azattyq úshin kúresken Alashorda qozǵalysynyń kósemi men músheleri. Bul serıalda jalpy 37 tarıhı keıipker beınelengen. Aýqymdy serıal bolǵaly tur. Bizdiń oıymyzsha, bul telehıkaıa jastar aýdıtorııasynyń ishinde Alashty keńirek nasıhattaýǵa múmkindik ashady dep oılaımyz», - dep túıdi telearna basshysy.
Basty foto: www.kinopark.kz
Barlyq quqyqtar qorǵalǵan. inform.kz belsendi siltemeni paıdalanyńyz http://www.inform.kz/kz/tar-zaman-telehikayasy-ulttyk-arnada-nauryz-ayynda-korsetile-bastaydy_a3166812
