Senat Tóraǵasy Máýlen Áshimbaev Memleket basshysynyń tapsyrmasy boıynsha Qyzylorda oblysynda bolyp, Táýelsizdiktiń 30 jyldyǵyna arnalǵan saltanatty is-sharaǵa qatysty. Máýlen Áshimbaev oblys turǵyndary aldynda sóz sóılep, Qazaqstannyń ótken kezeńdegi negizgi jetistikterine toqtaldy, dep habarlaıdy "Adyrna" ulttyq portaly.
«Táýelsizdik jyldarynda bizdiń memlekettiligimiz tolyq qalyptasty. Irgemiz bekip, shekaramyz birjola shegendeldi. Memlekettik ınstıtýttardyń berik negizi qalandy. Eskirgen josparly ekonomıkadan ýaqyt talabyna saı jańa ekonomıkalyq modelge kóshtik jáne ony nyǵaıta tústik», – dedi Senat Tóraǵasy.
Ol sondaı-aq Qazaqstannyń halyqaralyq qoǵamdastyqtyń tolyqqandy jáne yqpaldy múshesine aınalǵanyn atap ótti. Qazaqstannyń Tuńǵysh Prezıdenti – Elbasy Nursultan Nazarbaevtyń saıasatynyń arqasynda elimizdiń ortalyǵynda múldem jańa – Nur-Sultan qalasy salyndy. Elordanyń salynýy elimizdiń búkil ekonomıkasy men óńirlerdiń damýyna serpindi áser etti. Máýlen Áshimbaev osy jyldar ishinde Qyzylorda oblysy da qarqyndy damyp, qazir mańyzdy ındýstrııalyq jáne agrarlyq óńirge aınalǵanyn tilge tıek etti. Senat Tóraǵasy Aral problemasyn sheshý máselesine de nazar aýdardy.
«Tek Táýelsizdik alǵannan keıin ǵana Aral problemasyna shynaıy mán berile bastady. Tuńǵysh Prezıdentimizdiń usynysymen «Syrdarııa ózeniniń arnasyn retteý jáne Aral teńiziniń soltústik bóligin saqtaý» jobasy qolǵa alyndy. Osynyń nátıjesinde Soltústik Araldyń arnasy tolyp, kóptegen bıologııalyq túrler qalpyna kelgeni bárimiz úshin úlken qýanysh», – dep atap ótti Máýlen Áshimbaev.
Sondaı-aq Senat Tóraǵasy el Prezıdenti Qasym-Jomart Toqaevtyń bastamasymen Qazaqstanda saıası, áleýmettik jáne ekonomıkalyq reformalardyń jańa kezeńi bastalǵanyn aıtty.
«Prezıdentimizdiń tapsyrmasy boıynsha memlekettik basqarý salasynda júıeli reformalar júzege asýda. «Halyq únine qulaq asatyn memleket» tujyrymdasy negizgi qaǵıdaǵa aınaldy. Jergilikti ókildi jáne atqarýshy bıliktiń derbestigin arttyrý úshin mańyzdy qadamdar jasaldy. Bıyl tuńǵysh ret aýyl ákimderiniń tikeleı saılaýy ótti. Bul ózgeris halyqtyń jergilikti bılikti jasaqtaýǵa tikeleı yqpal etýine jol ashty», – dedi Senat Tóraǵasy.
Máýlen Áshimbaev sondaı-aq el Prezıdentiniń óńirlerdi damytýǵa erekshe nazar aýdaryp otyrǵanyn aıtty. Memleket basshysy bıylǵy qazan aıynda 10 ulttyq jobany bekitken bolatyn. Olardyń qatarynda «Qýatty óńirler – el damýynyń draıveri» arnaıy jobasy da bar.
«Bes jyl ishinde Óńirlerdi damytý boıynsha ulttyq jobany iske asyrýǵa aıtarlyqtaı qarajat bólinedi dep josparlanýda. Elimizdiń «ishki baılanysyn» kúsheıtý mindeti júktelip otyr. Ishki kólik jelisin damytý úshin respýblıkalyq mańyzy bar jáne jergilikti mańyzǵa ıe joldar salynyp, qaıta jańǵyrtylady. Bul Syr eliniń kólik-logıstıkalyq áleýetin odan ári arttyra túsetini sózsiz», – dedi Máýlen Áshimbaev.
Saltanatty shara barysynda Senat Tóraǵasy el Prezıdentiniń atynan elimizdiń jáne óńirdiń damýyna erekshe úles qosqan qyzylordalyqtarǵa memlekettik nagradalardy tabys etti.
Óńirge sapary barysynda Máýlen Áshimbaev Qyzylorda qalasynda tabaq shyny óndirý jáne óńdeý zaýytyn iske qosý rásimine qatysty. Oblys ákimi Gúlshara Ábdiqalyqovanyń aıtýynsha, Táýelsizdiktiń 30 jyldyq mereıtoıy qarsańynda iske qosylǵan bul kásiporynnyń óńir úshin mańyzy zor ári aımaq ekonomıkasyna oń áser etýge tıis.
«Jergilikti shıkizattyń 90 paıyzy shyny óndirisinde paıdalanylady. Soda kúli shyny qunynyń 80 paıyzyn quraıtyn negizgi bólik. Sondyqtan Aral qalasynda salynatyn soda zaýyty kásiporynnyń basty jabdyqtaýshysy bolady. Shyny zaýyty tolyq qýatymen jumys istegen kezde 226 jańa jumys orny ashylady, qosalqy óndiristerde 300-ge jýyq turaqty jumys orny iske qosylady, biz birinshi kezekte jergilikti mamandarǵa basymdyq beremiz», – dedi Gúlshara Ábdiqalyqova.
Máýlen Áshimbaev sonymen qatar, «Nurly jer» memlekettik baǵdarlamasy aıasynda salynǵan 50 páterli turǵyn úıdiń kiltin tapsyrý rásimine jáne sporttyq-saýyqtyrý kesheniniń ashylýyna qatysty.
«Táýelsizdiktiń 30 jyldyǵy – elimiz úshin mańyzdy meje, aıtýly beles. Qazaqstan bul kezeńge iri jetistiktermen jetip otyr. Al, endigi mindet – barymyzdy baǵalap, jeńisti jolymyzdy jalǵaý. Biz árdaıym Táýelsizdigimizdi saqtaýǵa, qorǵaýǵa jáne nyǵaıtýǵa kúsh salýymyz qajet. Ol úshin tatýlyǵymyz berik, birligimiz bekem, tirligimiz tııanaqty bolýǵa tıis. Osy baǵytta bárimiz jumylyp, nátıjeli eńbek ete beremiz dep senemin», – degen Máýlen Áshimbaev qyzylordalyqtardy Táýelsizdiktiń 30 jyldyǵymen quttyqtap, olarǵa baq-bereke tiledi.
"Adyrna" ulttyq portaly
