QR Tuńǵysh Prezıdent kúni qarsańynda Aqtaý qalasyndaǵy Nazarbaev Zııatkerlik mektebiniń 100 oqýshysy Mańǵystaý oblystyq Q.Sydıyqov atyndaǵy oblystyq kitaphanada «Uly dala muragerleri» dombyrashylar fleshmobyn ótkizdi. Dástúrli sharada zııatkerler uly aqyn Abaıdyń shyǵarmalary men halyq kúılerin oryndady.
Sharanyń basty maqsaty – QR Táýelsizdiginiń 30 jyldyǵyn ulyqtaý, babalar rýhyna shyǵarmalar arqyly taǵzym etý. Sondaı-aq bıylǵy oqý jylynda mektep qabyrǵasyn attaǵan zııatkerlik mekteptiń 120 oqýshysynyń múmkindikterin kórsetý, ulttyq tárbıege baýlý.
- Aqtaýdaǵy Nazarbaev Zııatkerlik mektep qabyrǵasyn attaǵan árbir 7-synyp oqýshysy mindetti dombyra úırený sabaǵyna qatysady. Búgin óner kórsetken balalardyń deni qyrkúıek aıynan bastap qolyna alǵash dombyra ustaǵan. Olarǵa arnaıy ýaqyt bólinip, mindetti sabaq júrgiziledi. Bul bastamamyz ata-analar talapynan da qoldaý tapqanyna qýanyshtymyz,- deıdi «Qos perne» dombyra úıirmesiniń jetekshisi Gúlsim Tájmaǵambetova.
Qala turǵyndaryna arnalǵan shara barysynda jas dombyrashylar aldymen Qurmanǵazy Saǵyrbaıulynyń «Balbyraýyn» kúıin oryndasa, keıin «Nár aǵashy», «Kerbez sulý» kúılerin naqyshyna keltirip oryndady. Fleshmobtyń ekinshi bólimi Abaı Qunanbaevtyń «Kózimniń qarasy», «Jelsiz túnde jaryq aı» týyndysymen jalǵasty.
- Men dombyrada oınaýdy qyrkúıek aıynan úırene bastadym. Bizge jetekshimiz apta saıyn sabaq ótkizip, qolymyzdy jattyqtyrdy. Qazaqstannyń jastary táýelsiz, erkin elde, jan jaqty, bilimdi, daryndy bolyp ósip kele jatqanyn kórsetetin sharaǵa qatysqanyma qýanyshtymyn. Búgingi sharany teýelsizdikke jetkizgen tulǵalarǵa arnaımyz, - deıdi 7-synyp oqýshysy Bıbinur Boshman.
«Adyrna» ulttyq portaly
