Aron Atabekti túrmede ýlap tastaǵany ras pa? (VIDEO)

1995
Adyrna.kz Telegram

Keshe kóz jumǵan aqyn, dıssıdent Aron Atabektiń denesi jaqyndaryna áli berilgen joq dep habarlaıdy "Adyrna" ulttyq portaly "qamshy.kz-ke" silteme jasap.

Qazirgi ýaqytta Almaty qalasy Qalqaman shaǵyn aýdanyndaǵy máıithanada aldynda marqumnyń jaqyndary men belsendilerden turatyn 40 shaqty adam tur. Olardyń arasynda Aronnyń qyzdary Alma men Aıdana da bar. Alaıda olar jýrnalıstermen sóılesýden bas tartty.

Tek belsendi, Aron Atabektiń senimdi serigi Muratbek Esenǵazy ǵana jaǵdaı týraly pikir bildirdi. Ol Aron Atabekti túrmede ýlap tastaǵan bolýy múmkin degen kúdigi baryn jetkizdi.

– Sap-saý, zińgitteı adamnyń sońǵy jeti aıda nasharlaı bastaǵany kúdik týdyrady. Ol ózi maǵan orysshalap "zdorov kak byk" dep aıtqan. Jattyǵý jasap turǵanyn da óz aýzynan estigem. Alaıda ol 7 aıdyń ishinde álsireı bastady. Bir kúni tańerteń turǵanda "qulaǵym taskereń bolyp qaldy", dedi. Odan keıin eki qoly istemeı qalýdy shyǵarǵan. Sóıtip 7 aıdyń ishinde konlagerden shyqqandaı bolyp otyr. Shynyn aıtqanda bizge tiri ólik qylyp jiberdi, – deıdi ol.

Belsendi túrmede Aron Atabekti gaz qoldaný, bolmasa taǵamyna birdeńe qosý arqyly birtindep óltirýi múmkin dep sanaıdy. Ol "biradamdyq kamerada jatqan adam qalaı ǵana koronavırýs juqtyrady" dep tańdanady. Sózinshe, Arondy túrmeden bosatqanda onyń ókpesiniń 16 paıyzy zaqymdanǵan. "Koronavırýsty ádeıi juqtyrmaǵanyn dáleldesin, búkil júıeni sotqa beremiz" — deıdi ol.

Muratbek Esenǵazy sondaı-aq daýlasyp júrip táýelsiz sot-medıınalyq saraptama jasaýǵa qol jetkizgenderin, alaıda oǵan kedergi jasaýǵa tyrysyp jatqandar baryn aıtady. Belsendi Qazaqstandaǵy táýelsiz sarapshylardy máıitke táýelsiz saraptama jasaýǵa, onyń nátıjesin buqpasyz jarııalaýǵa shaqyrdy.

Belsendi saraptama aıaqtalǵan soń Aron Atabektiń denesi qaryndasy Rázııanyń úıine arnaıy jedel járdem kóligimen jetkiziletinin aıtty.

– Sharıǵat zańyna saı, búgin jambasyn bir kún úıine tıgizip, erteń janazasyn shyǵaramyz dep otyrmyz. Endi taǵy birdeńe shyǵyp qalmasa, – deıdi Muratbek Esenǵazy.

Budan bólek jınalǵandardyń arasynda A.Aıqynbaev esimdi azamat Aronmen 1986 jyldan beri birge júrgenin, onyń ólimi qoldan jasalǵanyn, sebebi kúdikti jaıttardyń kóp ekenin jetkizdi.

 

 

 

"Adyrna" ulttyq portaly

 

Pikirler