Nursultan Nazarbaev prezıdenttik bılikten bas tartar kezde saıası júıedegi óz yqpalyn kezeń kezeńmen bosatýdy tereń josparlaǵan bolsa kerek. Búgin jetekshi «NurOtan» partııasy keńeıtilgen saıası keńesindegi partııa tóraǵasynyń jarııalaǵan sózin oqı otyryp osyndaı oıǵa keldim.
Eń birinshi eleń etkizgen jańalyq árıne, partııadaǵy tóraǵalyqty Qasym-Jomart Toqaevqa ótkizý týraly sheshim. Bul sheshim partııanyń saıası júıedegi alatyn ornyn eskere otyryp, saıası tranzıttiń mańyzdy qadamy dep baǵalaýǵa bolady. Partııa tóraǵasynyń bul sheshimin kópshilik dál qazir kútpese kerek. Degenmen bul sheshim partııalyq jańǵyrýǵa odan ári batyl júrgizýge jasalǵan qadam dep baǵalaýǵa bolady.
Elbasy búginde «Nur Otan» - elimizdiń basty saıası kúshi ekenin taǵy eske saldy. «Halyqaralyq tájirıbe qýatty memleket pen damyǵan azamattyq qoǵamnyń qalyptasýy úshin eldiń alǵa qaraı turaqty qozǵalysynyń 40-50 jyly qajet ekenin aıǵaqtaıdy. Bul kóptegen elderdegi bıleýshi saıası partııalardyń uzaq merzimdi kóshbasshylyǵy, bul sáttilik pen áleýmettik-ekonomıkalyq ósýdiń sharty boldy» dep atap ótti Nursultan Nazarbaev.
Bizdiń saıası júıeniń basty maqsaty - álemniń eń damyǵan 30 eliniń qataryna kirý. Bul jospar «Qazaqstan-2050» Strategııasynda belgilengen. Bul maqsatqa jetýdegi erekshe ról «Nur Otan» - ǵa júktelgen.
Partııanyń qazirgi tóraǵasy partııa óz jumysynda 5 negizgi prınıpti ustanýy kerek ekenin aıtty:
1.Árdaıym ýaqytpen birge júrý. Álemge kirgen ózgerister dáýiri bizdiń qoǵamda kórinis tabady. Partııa únemi jańaryp otyrýy, zamanaýı jáne utqyr bolýy, ózgerister aıasynda qalýy tıis.
2.Árqashan halyqtyń múddesin eskerý.Halyqtyń naqty máselelerin sheshe otyryp, partııa búkil eldiń damýyna yqpal etý.
3.Partııa aıqyn maqsattar men olarǵa qol jetkizýdiń naqty joldaryn aıtýy tıis.Barlyq aıtylǵan jasalýy tıis. Partııa árqashan saılaýaldy ýádelerin júzege asyrýdy qamtamasyz etýi kerek.
4.Partııa óziniń maqsattaryna jumyla jumylǵan jáne birtutas komandamen jetýge tıis.
5.«Nur Otan» - qoǵamdy búkil halyq úshin irgeli bolyp tabylatyn partııa qundylyqtarynyń aınalasyna toptastyrý kerek.
Nazarbaev úshin biriktirýshi ıdeıa - bul Qazaqstannyń gúldenýi men azamattardyń ál-aýqatyn arttyrý.
Elbasy elimizdiń óz táýelsizdiktiń otyz jyldyǵyn aıtýly jetistiktermen qarsy alyp otyrǵanyn erekshe aıtyp ótti:
Otyz jylda múldem jańa býyn qalyptasty. 9,5 mıllıonnan astam sábı dúnıege keldi. Bul halqymyzdyń jartysyn quraıdy. Jańa urpaqta múldem jańa dúnıetanym qalyptasýda. Nursultan Nazarbaev jańa urpaqtyń eń basty mıssııasy – memlekettikti saqtaý, Qazaqstandy «Máńgilik El» etý.
Osy oraıda Elbasy jańa dáýirdegi qazaqstandyqtarǵa baǵdar bolatyn «Eldiktiń jeti tuǵyry» atty qaǵıdattar jıyntyǵyn usyndy:
Ekinshi qundylyq -birlik pen kelisim – eldigimizdiń myzǵymas tuǵyry. Búginde birlik pen etnosaralyq tatýlyqty saqtaý bir shańyraqtyń astynda tatý-tátti ǵumyr keship, tatýlyq pen syılastyqty qamtamasyz etýdiń mańyzdylyǵyna toqtaldy.
Úshinshi - Jer – ata-baba murasy, halyq qazynasy. Qazaq úshin jerden qasıetti eshnárse joq. Tarıhymyzdaǵy soǵys ataýlynyń bári el men jerdi qorǵaý úshin bolǵan. 13 myńnan astam shaqyrym shekarany bekitý ońaı bolmaǵanyn bilemiz. Jer ata-baba amanaty.
Tórtinshi tuǵyr - otbasy men salt-dástúr – qoǵamnyń altyn dińgegi. Otanǵa degen súıispenshilik – óz otbasyńa, aýyl-aımaǵyńa, elińe degen mahabbat pen janashyrlyqtan bastalady.
Besinshi qundylyq - ulttyq mádenıet – halyqtyń rýhanı tiregi. Qazirgi tańda jahandyq básekege qabiletti bolý úshin biregeı ulttyq minez, asqaq rýh kerek. Mundaı qasıetter tarıhty bilý, mádenı qundylyqtardy taný arqyly keledi.
Altynshy - bilim men eńbek – baqýatty ómirdiń kilti. «Ózińe sen, ózińdi alyp shyǵar, eńbegiń men aqylyń eki jaqtap» dep dana Abaı aıtqandaı, biz tek óz bilimimiz ben kúshimizge senýimiz kerek.
Jetinshi - pragmatızm – básekege qabiletti bolýdyń kepili.
Elbasy usynǵan partııalyq 7 qundylyq «Máńgilik El» ulttyq ıdeıasyna negizdelgen dep aıta alamyz. Bul qundylyqtar partııalyqtarǵa ǵana emes, árbir qazaqstandyqqa túsinikti jáne jaqyn ıdeıalarǵa negizdelgen - adam, bostandyq, zańnyń ústemdigi, ádilettilik, yntymaqtastyq, bolashaqqa umtylý, otbasy jáne dástúrler.
Bul qundylyqtar Elbasynyń aıtýynsha «Nur Otan» ortalyq platformasynyń jáne Qazaqstanǵa 30 jyldyq joldy kúızelissiz ótýge múmkindik bergen bizdiń memlekettik baǵytynyń negizin quraıdy. Osy qundylyqtar endigi keler otyz jyldyqtarda qoǵamǵa baǵdar bolatyn ustanymdar. Eldiktiń jeti tuǵyry otyz jyldyq saıası tájirıbeden týyndaǵan jáne aıqyndalǵan basymdyqtarǵa negizdelgen. Sonymen birge bul tuǵyrlar álemdik tájirıbedegi jańa memleketterdiń negizin qalaǵan Mustafa Kemal, Djodj Vashıngton, Lı Kýan Iý sekildi tulǵalar memleketshildik ustanymdaryna sáıkes keledi.
Nursultan Nazarbaev óziniń 2007 jyly shyqqan «Qazaqstan joly» degen strategııalyq kitabynyń kirispesinde «...Bul jerde bosańdyqqa salynýǵa áste de bolmaıdy, eń bastysy – alǵa únemi umtylý. Tipti, beınelep aıtqanda chempıonnyń mindeti tek «altyndy» jeńip alý ǵana emes, sonymen birge óziniń kóshbasshylyq qalpyn ustap tura bilýinde. Al bul ózińniń aldyńa jańa, kúrdeli jáne bıik maqsattar únemi qoıyp otyrǵanda ǵana múmkin bolmaq...» dep jazǵan bolatyn. Búgingi kúngi aıtylǵan eldiktiń tuǵyry týraly oılary - aldyńǵy urpaq úshin amanat.
Elbasy óziniń kóshbasshylyq mıssııasyn saqtaı otyryp, saıası yqpalyn kezeń kezeńmen senip tapsyrýy logıkalyq oılastyrylǵan qadamdar dep oılaımyn. Barlyǵynyń tereń josparmen negizdelgen, ózindik máni bar áreketter. Prezıdenttik tranzıt endi partııalyq tranzıtke ulasty. Bul partııanyń uzaq merzimdi strategııalyq josparyna sáıkes keledi.
Tuńǵysh prezıdent aldaǵy 30 jyl – eldigimizdi nyǵaıtýdyń jańa kezeńi bolatyna úlken senimmen qaraıdy. Ol úshin ár azamat ultymyzdyń bolashaǵy úshin jaýapkershilikti óz moınyna alyp, ony tolyq sezine bilgen kezde júzege asady degen oımen qorytyndylaıdy.
Nursultan Nazarbaevqa zamandastarynyń bergen baǵasy qansha degenmen sýbektıvti kórinetini sózsiz. El tarıhynda «Qasym hannyń qasqa joly» nemese «Abylaıdyń aq jolyndaı», «Nazarbaev úlgisiniń» óziniń tıisti baǵasyn alatyny sózsiz. Tarıh barlyǵyna tóreshi.
Eldos Jumaǵulov, saıasattanýshy
