«Shymkent qalasy kásipodaqtar ortalyǵy» aýmaqtyq kásipodaqtar birlestiginiń tóraǵasy Baýyrjan Álteev shilde aıynan bastap shymkenttik temirjolshylardyń eńbekaqysy 10 paıyzǵa ósirilgenin málim etti, dep habarlaıdy QazAqparat tilshisi.
Baýyrjan Álteevtiń jergilikti BAQ ókilderimen ótken brıfıngide aıtqan málimetine súıensek, «Qazaqstan temir joly» Ulttyq kompanııasyna qarasty Shymkent magıstraldyq jeli bólimshesiniń qyzmetkerleriniń aılyǵyn 1 shildeden bastap 10%-ǵa kóterý týraly sheshim qabyldanǵan. «Kólik qyzmetkerleri kúnine» oraı kem degende 42500 teńge kóleminde syıaqy tólendi. Sondaı-aq, jeltoqsan aıynda Táýelsizdiktiń 30 jyldyǵyna oraı 1 AEK (42500 teńge) mólsherinde syıaqy tólenedi. 2021-2023 jyldarǵa jasalǵan jańa ujymdyq shartqa ózgerister engizildi. 2021 jylǵy maýsymnan bastap stanııalarda, razezderde, jaqyn mańdaǵy aýyldyq okrýgterde turatyn jáne osy stanııalar men razezderde jumys isteıtin qyzmetkerlerge qosymsha aqy tólenip jatyr», - dedi kásipodaq basshysy.
