Memleket basshysy IV Qytaı halyqaralyq ımporttyq taýarlar kórmesiniń ashylý rásiminde beıneúndeý jasady, dep habarlady «Adyrna» tilshisi Aqordaǵa silteme jasap.
– Bıyl bizdiń dostas halyqtarymyz óz tarıhyndaǵy mańyzdy beleske jetti. Qazaqstan Táýelsizdigine – 30 jyl. Qytaı Kommýnıstik partııasynyń qurylǵanyna – 100 jyl. Sondaı-aq, eki aıdan keıin taǵy bir aıtýly oqıǵany atap ótemiz. Qazaqstan men Qytaı arasynda dıplomatııalyq qatynastardyń ornaǵanyna 30 jyl tolady. Búgin bizdiń jan-jaqty ári máńgilik strategııalyq seriktestigimiz kemeldenip, jańa kezeńge qadam basty dep nyq senimmen aıta alamyn. Qarqyndy damyp kele jatqan Qytaı eli árdaıym Azııadaǵy eń basty jáne senimdi seriktesimiz bolyp qala beredi, – dedi Qazaqstan Prezıdenti.
Memleket basshysy ózara tıimdi ekijaqty yntymaqtastyq keń-baıtaq Eýrazııa qurlyǵynda birlese damýǵa jáne órkendeýge jol ashyp otyrǵanyna, saýda-ekonomıkalyq qatynastar – yqpaldastyǵymyzdyń berik irgetasy ekenine toqtalyp, aldaǵy kezeńde solaı bola beretinin atap ótti.
– Qıyndyqqa qaramastan, kúrdeli 2020 jyldyń ózinde ekijaqty taýar aınalymy 5 paıyzǵa ósip, 15 mıllıard dollardan asty. «Ózgerister jeli soqqanda, bireýler qabyrǵa turǵyzady, endi bireýler jel dıirmen salady», – degen kóne qytaı naqyly bar. Pandemııaǵa baılanysty Qazaqstan-Qytaı shekarasyna engizilgen ýaqytsha shekteý sharalary tezirek aıaqtalyp, alys-beris qaıtadan jandana túsedi dep senemiz, – dedi Qasym-Jomart Toqaev.
Qazaqstan Prezıdenti quttyqtaý sózinde saýda-sattyq árdaıym órkendeýdiń jáne halyqaralyq yntymaqtastyqtyń basty qozǵaýshy kúshi sanalatynyn, bul qaǵıdat ǵasyrlar boıy Uly Jibek jolynyń boıynda ornalasqan bizdiń óńir úshin de asa mańyzdy ekenin aıtty.
– Osy ejelgi saýda joly Tóraǵa Sı zınpınniń «Beldeýler men joldar» atty aýqymdy bastamasynyń arqasynda qaıta jańǵyrdy. Qazir jyl saıyn Qytaıdan Eýropaǵa Qazaqstan aýmaǵy arqyly 500 myńnan astam konteıner tasymaldanady. Quryq teńiz aılaǵy iske qosylǵannan keıin «Lıanıýngan – Kars» tasymal dálizimen Qorǵastan Ystanbulǵa júk jetkizý merzimi bes esege, ıaǵnı 60 kúnnen 13 kúnge deıin qysqardy. Biz Qorǵastan bólek, birqatar kórshiles eldermen jańa shekaraaralyq hab quryp jatyrmyz, – dep atap ótti Memleket basshysy.
«Adyrna» ulttyq portaly
