Qaqaǵan aıazda qınalǵan Baıan-Ólgııdegi qazaq otbasylaryna Franııa qazaqtary kómir túsirip berip, kıim-keshek taratty. Kómek alǵan otbasylar áleýmettik jelide alǵys jaýdyryp jatyr, dep jazady centralasian.org portaly.
Mońǵolııanyń Baıan-Ólgıı aımaǵynda shamamen 100 myńǵa jýyq qazaq otbasy turady. Qańtar aıynyń ortasynda qystyń qatty bolyp jatqanyn estigen Franııadaǵy qazaq qoǵamy (AKFT) mońǵolııalyq qazaq otbasylaryna kómir men ózge de qajetti zattar alýy úshin aqsha jınap beripti.
- Shamamen 40 tonnadaı kómir aldyq. Odan bólek otyn, kıim-keshek, oqýshy balalarǵa dápter, qalam, qaǵaz-qaryndash aldyrdyq. Kómiri joq otbasylarǵa mashınamen túsirip berdik. Kómir almaǵandar otyn, kıim-keshek sııaqty zattar aldy. Munda kedeı otbasylar kóp, - deıdi Baıan-Ólgıı turǵyny Dákeı Byqıuly.
Onyń aıtýynsha, bıyl qys qatty bolǵandyqtan aımaqtaǵy kóp otbasy kómir túsiretin aqshalary bolmaı, qınalyp qalǵan. Franııa qazaqtary jibergen kómek qystyń kózi qyraýda sál de bolsa demeý bolǵan.
Franııadaǵy qazaqtar qoǵamynyń dereginshe, qazir Franııada 250-deı qazaq otbasy turady. Olardyń 175-i qoǵamǵa múshe. Parıjden alystaý jerlerde turatyndary qoǵamǵa áli tirkelmegen.
Bıyl Mońǵolııamen qatar Qazaqstanda da qańtar aıynda kún qatty sýyp, shyńyltyr aıaz kezinde birneshe qalada mektepter jabylyp, kómir men gaz tapshylyǵy baıqalǵan.
