QR Táýelsizdiginiń 30 jyldyǵyna oraı megapolıstegi teatrlarda «Qoıylymdyq kostıýmder kórmesi» ótti. Shymkent qalalyq mádenıet, tilderdi damytý jáne arhıvter basqarmasynyń uıymdastyrýymen ótken sharada teatr ujymdary eń tańdaýly qoıylymdardyń sahnalyq kıim úlgilerin usyndy.
Shymkent qalalyq qýyrshaq jáne jasóspirimder teatry Mysyr elin bılegen, Qypshaq dalasynyń uly qaharmany Sultan Beıbarysqa arnalǵan R.Otarbaevtyń «Saǵynysh shóbi», B.Parmanovtyń «Alpamys» jáne Abaı Qunanbaıulynyń 175 jyldyǵyna oraı sahnalanǵan A.Altynbekovtyń «Dara tulǵa» poetıkalyq dramasynyń sahnalyq kıimderi men keıipker qýyrshaqtardyń kórmesin uıymdastyrdy. Bul kórme qala turǵyndary men qonaqtarynyń teatr tynysymen tanysyp, asyl ónerge bir taban jaqyndaýǵa múmkindik berdi.
Al, Shymkent qalalyq ázil-syqaq jáne satıra teatry kórmege amerıkandyq dramatýrg Nıl Saımonnyń álem ádebıetiniń injý-marjanyna aınalǵan «Áýmeserler» komedııasyndaǵy qoıylymdyq kıimderin qoıdy. Spektakl qazaq tilinde tuńǵysh ret Farhadbek Qanafınniń rejısserligimen sahnalanǵan bolatyn. XX ǵasyrdyń 80 jyldarynda jazylǵan pesa taqyryby kúni búginge deıin óziniń ózektiligin joıǵan emes. «Áýmeserler» komedııasynda kórinis jelisi bir-birimen shıryǵa órbip, sońynda bilimniń kúshi mahabbatqa ulasyp, áýmeser keıipkerler saý adamǵa aınalady.
Bekzat óner ordasy Shymkent qalalyq opera jáne balet teatry repertýardaǵy eń qyzyqty kostıým úlgilerin usyndy. Qazaq opera jaýharlarynan M.Tólebaevtyń «Birjan Sara», T.Jarmuqamedtiń «Domalaq ana», A.Jubanov pen L.Hamıdıdiń «Abaı» jáne shetel klassıkterinen Dj.Verdıdiń «Rıgoletto», Dj.Rossınıdiń «Sevıldik shashtaraz», P.I.Chaıkovskııdiń «elkýnchık» qoıylymdaryndaǵy kıimder eskızderimen qosa usynyldy.
Atalmysh kórme 12-18 qazan aralyǵynda ár teatrdyń ǵımaratynda ótedi. Teatr súıer qaýym kórme aıasynda túrli qoıylym keıipkerleriniń jáne ár kezeńdegi kıim úlgisimen tanysa alady.
