Qoǵamdyq densaýlyq saqtaý ulttyq ortalyǵynyń «Sanıtarııalyq-epıdemıologııalyq saraptama jáne monıtorıng ǵylymı-praktıkalyq ortalyǵy» fılıaly dırektorynyń orynbasary Manar Smaǵul jasóspirimder men dúkti áıelderdi COVID-19-ǵa qarsy vakınalaý týraly pikir bildirdi, dep habarlaıdy «Adyrna» tilshisi QazAqparatqa silteme jasap.
«Damyǵan elderdiń bári jasóspirimder men júkti áıelderge osy vakınany salyp jatyr. AQSh pen Ulybrıtanııada atalǵan toptardy vakınalaý tájirıbesi bar. Iaǵnı, Pfizer vakınasynyń tıimdiligin biz is júzinde kórip otyrmyz. Birinshiden, ólim-jitim jaǵdaılary azaıǵan. Jalpy syrqattaný kórsetkishi de kemigen. Bul vakına 12 jastan asqan balalardyń da, júkti áıelderdiń densaýlyǵyna qaýip tóndirmeıdi. Dúnıejúzilik densaýlyq saqtaý uıymynyń ózi usynyp otyr», - degen maman qazaqstanda eresek adamdarǵa búginge deıin salynǵan vakınalardyń tıimdi bolǵanyna toqtaldy.
«Reseılik, qazaqstandyq, qytaılyq vakınalardyń balalar men júkti áıelder úshin qanshalyqty tıimdi ekeni belgisiz bolǵanymen, qazir qoldaný maqsatyna sáıkestigin kórsetip otyr. Bul jerde mynany túsiný kerek. Bizde buǵan deıin eresekterge salynǵan vakınalardy balalar men jasóspirimderge salýǵa múldem tyıym salynǵan deýge bolmaıdy. Óıtkeni olar atalmysh eki topqa synaq retinde egilgen joq.
«Spýtnık V» qazir osy másele boıynsha synaqtan ótip jatyr. QazVac-ta bul satydan ótedi. Naqty jasóspirimder men júkti áıelderdiń arasynda synaqtan ótkennen keıin ruqsat máselesi sheshiledi. Meniń oıymsha oǵan sál ýaqyt kerek. Tıisti zertteýler jaqsy nátıje berse, olardy da atalmysh eki topqa qoldanýymyz múmkin. Al ázirge Pfizer vakınasy ǵana osy eki topqa usynylǵan. Buǵan qarap bizdegi basqa vakınalar COVID-19 indetine Pfizer vakınasyndaı tıimdi emes degen oı týyndamaýy kerek. Biz qoldanyp júrgen vakınalardyń bári vırýsqa tıimdi ekenin ýaqyt kórsetti», - dedi Manar Smaǵul.
«Adyrna» ulttyq portaly
